रुकुम पश्चिमको एक विद्यालयमा दिवा खाजा कार्यक्रम अन्तरर्गत विद्यार्थीलाई आउने रकम अभिभावकले बुझ्ने गरेका छन् । जिल्लाको मुसिकोट नगरपाकिा वडा नम्बर ८ मा रहेको आधारभुत विद्यालय घोरखानीमा विद्यार्थीलाई प्राप्त हुने दिवा खाजाको रकम विद्यार्थीका अभिभावकले बुझ्ने गरेको पाइएको छ । दिवा खाजाका लागि प्रति विद्यार्थी १५ रुपैंया आउने गरेपनि यो विद्यालयमा भने दिवा खाजा खुवाउने कार्यक्रम संचालनमा छैन् । 

विद्यार्थीलाई फरक बार फरक प्रकारको दिवा खाजा खुवाउने कार्यक्रम भएपनि उक्त विद्यालयका विद्यार्थीले विद्यालयमा खाजा खान पाउदैनन् । बरु अभिभावकले वार्षिक रुपमा विद्यार्थीलाई दिवा खाजा अन्तरर्गत प्राप्त हुने रुकम एक मुस्ट बुझ्ने गरेका छन् । विद्यार्थीका अभिभावकहरुले दिवा खाजा बाफतको रुकम आफै बुझ्ने भनेपछि विद्यालय व्यवस्थापन समिति र अभिभावकहरुको निर्णय अनुसार दिवा खाजाको रकम अभिभावकलाई दिने गरिएको प्रध्यानाध्यापक पूर्णबहादुर थापाले बताउनुभयो । 

‘अहिले बालशिक्षा देखि कक्षा ६ सम्म अध्यनरत विद्यार्थीलाई दिनको १५ रुपैयाँका दरले दिवा खाजा रुकम आउँछ, प्राप्त भएको सवै रकम अभिभावकलाई बोलाएर दिने गरेका छौं, प्रअ थापाले भन्नुभयो ।’ मुसीकोट नगरपालिकाले भने दिवा खाजा अन्तरर्गत प्राप्त भएको रकम अभिभावकको लागि नभई विद्यार्थीको वौद्धिक विकास र शारीरिक विकासका लागि भएको बताएको छ । 

विद्यार्थीलाई आवश्यक पोषण तत्व प्राप्त होस भनेर यो कार्यक्रम संचालनमा रहेको र अव देखि विद्यालयमै खाजा पकाएर खुवाउन बिद्यालयलाई निर्देशन दिई सकिएको मुसिकोेट नगरपालिका सामाजिक विकास समितिका संयोजक एक्कबहादुर पाण्डे बताउनुभयो । यदि दिवा खाजा कार्यक्रम संचालन भएको नपाइएमा दिवा खाजा कार्यक्रम अन्तरर्गत प्राप्त हुने रकम रोक्का गर्ने चेतावनी दिइएको पाण्डेले बताउनुभयो । 

२०३२ सालमा स्थापना भएको आधारभुत विद्यालय घोरखानीमा अहिले बालशिक्षा देखि कक्षा ८ सम्म पढाई सञ्चालन भइरहेको छ ।