राप्ती राजमार्गमा मुसिकोट नगरपालिकाको मार्किङ, मिचिएको क्षेत्र खाली गरिदैं

स्थानीय सरकार

Home
स्थानीय सरकार
राप्ती राजमार्गमा मुसिकोट नगरपालिकाको मार्किङ, मिचिएको क्षेत्र खाली गरिदैं

राप्ती राजमार्गमा मुसिकोट नगरपालिकाको मार्किङ, मिचिएको क्षेत्र खाली गरिदैं भाद्र ३० गतेसम्म सडक मिचेर बनाइएका संरचना हटाउन नगरपालिकाको निर्देशन, पालना नभए आँफै हटाउने ।

कखरा संवाददाता मंगलबार, भदौ १९, २०८०

मुसिकोट ५ बागबजारमा राप्ती राजमार्गको क्षेत्र पहिचान गरिदैं ।

रुकुम पश्चिमको मुसिकोट नगरपालिकाले मुआब्जा बुझेका जग्गामा निर्माण गरिएका संरचनामा नजर लगाएको छ । राप्ती राजमार्गको शेरिगाउँ देखि सल्लेसम्म र सोलाबाङ बजारमा मुआब्जा बुझिसकेका जग्गामा निर्माण भएका संरचनामा नगरपालिकाले नजर लगाएको हो । साँघुरो सडकका कारण मुसिकोटमा सवारी व्यवस्थापनमा असहजता भएपछि नगरपालिकाले मुआब्जा बुझिसकेका राप्ती राजमार्गको अधिकारमा रहेको क्षेत्रमा निर्माण गरिएका संचरना हटाउने तयारी सुरु गरेको छ । नगरपालिकाले ३० दिनको समय दिएर सडक आसपासको मुआब्जा लिइसकेका जग्गामा निर्माण गरिएका संरचना आँफै हटाउन अनुरोध गरिसकेको छ ।

साउन ३० गते सूचना जारी गरी अवैध संरचना हटाउन नगरपालिकाले दिएको ३० दिनको समय भाद्र ३० गते सकिदै छ । त्यस्ता संरचना स्वयम् हटाउन एक महिनाको समय तोकेको नगरपालिकाले राप्ती राजमार्गको खास एरिया छुट्याउन सुरु गरेको छ । सेरिगाउँ देखि सल्लेसम्मको क्षेत्रमा र सोलाबाङ बजारमा मुआब्जा बुझेका जग्गा छुट्याउन नगरपालिका लागेको हो । सोमबार सेरिगाउँ देखि बागबजारसम्म सडकको दायाँ र बायाँको एरियामा रातो चिन्ह लगाइएको नगर प्रहरी प्रमुख उमेश केसीले जानकारी दिनुभयो ।

मुसिकोट ५ सेरीगाउँमा राप्ती राजमार्गको क्षेत्र पहिचान गरिदैं ।

उहाँका अनुसार दोस्रो दिन आज मंगलबार खलंगाको त्रिवेणी चोकबाट सल्लेसम्म मार्किङ गरिएको छ । सेरिगाउँ देखि सल्ले र सोलाबाङ बजारमा राप्ती राजमार्गको दायाँबायाँ चेपुवामा परेको जग्गा छुट्याउने कार्यक्रम अन्तर्गत सेरिगाउँ देखि सल्लेसम्मको क्षेत्रमा राप्ती राजमार्गको एरियामा मार्किङ गरिएको र अब सोलाबाङमा बाँकी रहेको उहाँले बताउनुभयो । प्राविधिक सहितको जनप्रतिनिधि, कर्मचारी र नगर प्रहरीको टोलीले सडकको क्षेत्र पहिचान गरिरहेको छ । ५ नम्बर वडामा पर्ने सडक आसपासको क्षेत्र पहिचान गरिसकिएको मुसिकोट नगरपालिकाका प्रवक्ता समेत रहनुभएका वडा नम्बर ५ का अध्यक्ष समिरजंग मल्लले बताउनुभयो ।

‘नगरपालिकाले मुआब्जा बुझेका क्षेत्रमा बनेका संरचना हटाउन सूचना जारी गरेपछि केही अन्योलता देखिए, कुन क्षेत्र मुआब्जा बुझेको हो कुन होइन भनेर सबैलाई थाहा हुन नसकेको पाइयो, उहाँले भन्नुभयो–यो अन्योलतालाई हटाउनका लागि राप्ती लोकमार्गको क्षेत्रमा मार्किङ गरिएको हो ।’ यसबाट सडकको क्षेत्र कति हो भनेर स्पस्ट भएको र कुन कुन संरचना सडक मिचेर बनेका छन् भनेर खुलेको उहाँले बताउनुभयो । सडकको क्षेत्र पहिचान भएपछि नगरपालिकाले तोकेको समयसिमा भित्र स्वयम् व्यक्तिले उक्त संरचना हटाउन सहयोग पुग्ने विश्वास गरिएको छ ।

मुसिकोट १ खलंगाको हुलाक मुनी राप्ती राजमार्गको क्षेत्र पहिचान गरिदैं ।

तोकिएको समयमा उक्त संरचना नहटाएमा भने नगरपालिकाले आँफैले हटाउने नगर प्रमुख महेन्द्र केसीले बताउनुभयो । मुसिकोटमा दिनहुँ सवारी चाप बढ्दै गएका कारण सवारी चाप व्यवस्थापन गर्न मुश्किल भएको र बजार एरियामा सडक तथा सार्वजनिक जग्गा मिचेर संरचना निर्माण गर्ने क्रम बढेपछि राप्ती राजमार्गको मिचिएको जग्गा खाली गर्न लागिएको उहाँको भनाई छ । नगरपालिकाको यो कदमलाई सकारात्मक रुपमा लिइएको छ ।

प्रकाशित मिति: मंगलबार, भदौ १९, २०८० १३:३४