माओवादी केन्द्रका दुई नगर सदस्य पार्टीबाट निष्कासन

राजनीति

Home
राजनीति
माओवादी केन्द्रका दुई नगर सदस्य पार्टीबाट निष्कासन

माओवादी केन्द्रका दुई नगर सदस्य पार्टीबाट निष्कासन

कखरा संवाददाता आइतबार, साउन १५, २०७९

नेकपा माओवादी केन्द्र चौरजहारीले २ जना नगर समिति सदस्यलाई कारबाही गरेको छ । पार्टीको नीति, विधि र पद्धति भन्दा बाहिर गएर काम गरेको भन्दै पार्टीले नगर सदस्य तिलक बस्नेत र उदे खत्रीलाई कारबाही गरेको हो ।

नगर समितिको बैठकले पार्टीको हित विपरीत विपक्षिलाई सघाउने कार्यमा संलग्न भएको भन्दै बस्नेत र खत्रीलाई साधारण सदस्य समेत नरहने गरी कारबाही गरेको जनाएको छ । गत स्थानीय तहको निर्वाचनका क्रममा पार्टीका आधिकारीक उम्मेदवार विरुद्ध लागेको आरोप बस्नेत र खत्रीमाथी लागेको थियो ।

३ नम्बरका बस्नेत र ५ नम्बरका खत्रीलाई पार्टीले कारबाही गरेको नगर अध्यक्ष श्रीकृष्ण शर्माले जानकारी दिनुभयो । खत्री ५ नम्बर वडाका निवर्तमान वडाध्यक्ष समेत हुन् । पार्टीका जिल्ला इन्चार्ज, केन्द्रीय सदस्यहरुको उपस्थितिमा बसेको बैठकले यो निर्णय गरेको अध्यक्ष शर्माले बताउनुभयो । बैठकबाट थप छानविनका लागि भन्दै छानविन समिति समेत बनाएको छ ।

पार्टी नगर सचिव विरबहादुर रानाको संयोजकत्वमा बनेको छानविन समितिले ६ नम्बर वडा र १४ नम्बर वडा सहित अन्य ठाउँको पनि छानविन गरी प्रतिवेदन बनाउने छ । ६ नम्बर वडामा माओवादीका ४ जना सदस्यले चुनाव जित्दा वडाध्यक्षका उम्मेदवार पराजित भएका थिए । १४ नम्बर वडाध्यक्षका माओवादीका उम्मेदवार ४ मतले पराजित भएका थिए । यो सहित अन्य वडाको पनि छानविन गरी समिति बनाइएको अध्यक्ष शर्माले बताउनुभयो ।

प्रकाशित मिति: आइतबार, साउन १५, २०७९ १०:३९