भोलीबाट सुरु हुन लागेको नेकपा माओवादी केन्द्रको जनतासंग माओवादी विशेष रुपान्तरण अभियानको तयारी रुकुम पश्चिममा पुरा भएको छ । जिल्लाका ६ स्थानीय तहका ७३ वडामा अभियानका लागि सबै तयारी पुरा भएको नेकपा माओवादी केन्द्र रुकुम पश्चिमले जनाएको छ । तयारी बैठक देखि नेताहरुको कार्यविभाजन, अभियान संचालनको खाका तयार सम्मका सबै तयारी सकिएको नेकपा माओवादी केन्द्रका जिल्ला संयोजक गोविन्द रोका सचिनले जानकारी दिनुभयो ।

भोली नेकपा माओवादी केन्द्रका अध्यक्ष पुष्पकमल दाहाल प्रचण्डले देशभरमा एकै पटक यो अभियानको उद्घाटन गर्दै हुनुहुन्छ । जुन अभियान जिल्लामा संचालन गर्न तम्तयार भएर बसेको संयोजक रोकाले बताउनुभयो । उहाँका अनुसार जिल्ला इन्चार्ज, पालिका इन्चार्ज, वडा इन्चार्ज देखि टोलसम्मको जिम्मेवारी लिएर नेताहरु कार्यक्षेत्रमा खटिसकेका छन् । माओवादीले सबै केन्द्रीय सदस्यहरुलाई जिल्ला देखि अन्य तहको इन्चार्जको जिम्मेवारी तोकेर खटाएको छ । त्यस्तै अन्य सबै नेताहरुलाई पनि विभिन्न जिम्मेवारी तोकेर गाउँ पठाइएको माओवादी केन्द्रको भनाई छ । सबै नेताहरुलाई आफु कार्यरत रहेको भन्दा फरक क्षेत्रमा खटाइएको छ ।

यो अभियानका लागि रुकुम पश्चिममा जाजरकोटका गगन खड्का जीवनलाई पठाइएको छ । त्यस्तै पालिका इन्चार्जका रुपमा मुसिकोटमा जीवन बुढा, चौरजहारी नगरपालिकामा टीकाराम ओली, आठबीसकोट नगरपालिकामा लुम्बिनी गौतम, सानीभेरी गाउँपालिकामा मनबहादुर रावत, बाँफिकोट गाउँपालिकामा नेपबहादुर कँवर र त्रिवेणी गाउँपालिकामा रत्नबहादुर ओली खटिनुभएको छ । यो अभियान अन्तर्गत संगठन विस्तार, सदस्यता वितरण तथा नविकरण, छलफल, बैठक, जनभेटघाट लगायतका गतिविधि संचालन हुने नेकपा माओवादी केन्द्रले जनाएको छ । यो अभियानबाट २५ लाख मतदातासंग प्रत्यक्ष संवाद गर्ने र ८ लाख सदस्य बनाउने मुख्य उदे्श्य राखिएको छ । भोलीबाट सुरु भएको अभियान तीन महिनासम्म संचालन हुने छ ।