कर्णाली प्रदेशको राजधानी वीरेन्द्रनगर सुर्खेतमा जारी मुख्यमन्त्री कप टी–२० क्रिकेट प्रतियोगितामा रुकुम पश्चिमले विजयी सुरुवात गरेको छ । वीरेन्द्रनगरको कालिन्चोक क्रिकेट मैदानमा आज भएको पहिलो खेलमा रुकुम पश्चिमले जाजरकोटलाई पराजित गर्दै जीतको सुरुवात गरेको हो । भने महत्त्वपूर्ण २ अङ्क जोडेको छ । वर्षाले प्रभावित बनाएपछि खेल ५ ओभरमा झारेर खेलाइएको थियो ।

टस हारेर ब्याटिङको निम्तो पाएको रुकुम पश्चिमले अरविन्द घर्तीको आक्रामक ब्याटिङमा निर्धारित ५ ओभरमा २ विकेटकाे क्षतिमा ६९ रन बनाएको थियो । अरविन्दले ४८ रनकाे याेगदान गरे भने अर्जुन घर्ती १३ रन बनाएर रन आउट भएका थिए । विजय पुन १ रन बनाएर इनिङकाे अन्तिम बलमा आउट भएका थिए । जाजरकोटका लागि निवास हमालले १ विकेट लिए ।

जबाफी ब्याटिङमा उत्रिएको जाजरकोट निर्धारित ५ ओभरमा ३ विकेटको क्षतिमा ४९ रनमा समेटियो । जाजरकोटका लागि बिष्णु शाहीले २४, साैगात कार्कीले १८ र सुमन गुरुङले १ रनकाे योगदान गरे । बलिङ तर्फ रुकुम पश्चिमका रुकुम पश्चिमका कप्तान ताराप्रकाश गिरी विवशले १ विकेट लिए ।

जाजरकोटको यो दोस्रो खेल हो । उसले हिजो भएको पहिलो खेलमा कालिकोटलाई पराजित गर्दै २ अङ्क जोडेको थियो । रुकुम पश्चिमको पहिलो खेल हिजो दैलेखसँग रहेकामा वर्षाका कारण स्थगित भएपछि अङ्क बाँडेको थियो । समूह ए मा रुकुम पश्चिम ३ अङ्कका साथ शीर्ष स्थानमा छ । जाजरकोट २ अङ्कका साथ दोस्रो, दैलेख १ अङ्कका तेस्रो र कालिकोट अङ्क विहीन चौथो स्थानमा रहेको छ ।

आजै हुने दोस्रो खेलमा कालिकोट र दैलेख खेल्ने छ । प्रतियोगिताको समूह ए मा रुकुम पश्चिम, दैलेख, कालिकोट र जाजरकोट रहेका छन् । समूह बि मा भने सुर्खेत, सल्यान र जुम्ला रहेका छन् । दुवै समूहबाट उत्कृष्ट दुई टिम सेमिफाइनलमा प्रवेश गर्ने छन् । कर्णाली प्रदेश खेलकुद विकास परिषद्को सहयोगमा कर्णाली प्रादेशिक क्रिकेट सङ्घले आयोजना गरेको प्रतियोगितामा प्रदेशका ७ वटा जिल्लाको सहभागिता रहेको छ ।

१४ गतेसम्म सञ्चालन हुने प्रतियोगिताको विजेताले १ लाख १० हजार पुरस्कार पाउँदा उप विजेताले ५१ हजार रुपैयाँ पुरस्कार पाउने छ ।