रुकुम पश्चिमको सदरमुकाम मुसिकोटमा बुधवार भोलीबाट सुरु हुने जनक–सुदन स्मृति कप रनिङ शिल्डको तेस्रो संस्करणको तयारी पुरा भएको छ । आयोजक रुकुम पश्चिम भलिबल प्रशिक्षण केन्द्रले प्रतियोगिताको तयारी पुरा भएको र तोकिएकै समय असोज १ गते बुधवारबाट प्रतियोगिता सुरु हुने जनाएको छ ।
प्रतियोगितामा २० टिमले प्रतिस्पर्धा गर्ने आयोजकले जनाएको छ । रुकुम पश्चिम, रुकुम पूर्व, रोल्पा र जाजरकोटका गरी २० टिले प्रतिस्पर्धा गर्ने आयोजक रुकुम पश्चिम भलिबल प्रशिक्षण केन्द्रका अध्यक्ष तेज बुढाले जानकारी दिनुभयो । उहाँका अनुसार प्रतियोगिता भोली सुरु हुने भए पनि उद्घाटन भने पर्सी बिहीबार हुने छ ।
जेन–जी आन्दोलनमा ज्यान गुमाएकाको शोकमा भोली सरकारले शोक बिदा दिएको छ । शोक बिदामा औपचारिक कार्यक्रम गर्न नमिल्ने भएकोले उद्घाटन पर्सी हुने बुढाले बताउनुभयो । भोलीबाट सुरु हुने प्रतियोगिता असोज ५ गतेसम्म चल्ने छ । प्रतियोगिता शुद्ध वडा स्तरीय रहेको छ ।
प्रतियोगिताकाे विजेताले १ लाख १५ हजार, उपविजेताले ७५ हजार, तेस्रो स्थान प्राप्त गर्नेलाई ५१ हजार र सान्त्वना स्थान प्राप्त गर्नेलाई २५ हजार रुपैयाँ सहित स्थान प्राप्त गर्ने सबै टिमलाई कप, मेडल र प्रमाणपत्रको व्यवस्था गरिएको अध्यक्ष बुढाले जानकारी दिनुभयो । त्यस्तै विजेता टिमले शिल्ड प्राप्त गर्ने उहाँले बताउनुभयो ।
उहाँका अनुसार विधागत रूपमा उत्कृष्ट खेल प्रदर्शन गर्नेलाई समेत पुरस्कारको व्यवस्था गरिएको छ । विधागत तर्फ वेस्ट प्लेयरलाई ५ हजार, वेस्ट स्पाइकर, वेस्ट सर्भर, वेस्ट लिवेरो, वेस्ट ब्लकर, बेष्ट सेटर, उदयमान खेलाडी, र बेष्ट कोचले सम्मान २÷२ हजार रुपैयाँ पुरस्कार सहित प्रमाणपत्र पाउने उहाँले जानकारी दिनुभयो ।
सुरुको वर्ष र गत वर्ष महिला पुरुष भलिबल आयोजना गरेको प्रशिक्षण केन्द्रले यस पटक भने पुरुष भलिबल प्रतियोगिता मात्र आयोजना गरेको छ । तीन वर्ष अघिदेखि जनक–सुदनको स्मृतिमा रुकुम भलिबल प्रशिक्षण केन्द्रले भलिबल प्रतियोगिता आयोजना गर्दै आइरहेको छ ।
भलिबल खेलाडी द्वय जनक शाह र सुदन श्रेष्ठको स्मृतिमा रुकुम पश्चिम भलिबल प्रशिक्षण केन्द्रले २०८० सालदेखि जनक–सुदन स्मृति कप रनिङ शिल्ड भलिबल प्रतियोगिताको आयोजना गरिरहेको छ । दुवै जनाको २०७४ सालमा गाडी दुर्घटनामा मृत्यु भएको थियो ।।
