नेपाल प्रिमियर लिग विजेता लुम्बिनी लायन्सको ट्रफि टुर रुकुम पश्चिमको मुसिकोट नगरपालिका १ त्रिवेणी चोकमा भव्य स्वागत गरिएको छ । आज जिल्ला क्रिकेट संघ रुकुम पश्चिमको अगुवाइमा विजेता लुम्बिनी लायन्सको टिम सहित ट्रफि टुरलाई भव्य स्वागत गरिएको थियो । बागबजारदेखि बाजागाजासहित त्रिवेणी चोकमा आएर ट्रफि प्रर्दशन गरिएको जिल्ला क्रिकेट संघ रुकुम पश्चिमका अध्यक्ष दिपक बाँठाले जानकारी दिनुभयो । ट्रफि टुरमा जिल्लाबासी, क्रिकेट प्रेमीहरुको उल्लेखनीय उपस्थिती रहेको थियो । आजै ट्रफि टुर रुकुम पूर्वको रुकुमकोट पुगेको छ । त्यहाँ भव्य कार्यक्रम हुने बताइएको छ । दोस्रो संस्करणको ट्रफि उचालेको लुम्बिनी लायन्सले प्रदेशका सबै जिल्लामा ट्रफि टुर गर्दै छ । जस अनुसार आज रुकुमकोटमा ट्रफि टुर हुने भएको हो । 

हिजो  दाङ पुगेको टुर आज, सल्यान, रुकुम पश्चिम हुँदै रुकुमकोट पुगेको छ । ट्रफिसहित भोली त्यहाँबाट टोली रोल्पा पुग्ने लुम्बिनी लायन्सले जनाएको छ । लुम्बिनी लायन्सले पुस ५ गते नेपालगञ्जको बागेश्वरी मन्दिर टुर सुरु गरेको हो । उक्त टुर पुस १५ गते रुपन्देहीमा पुगेर सम्पन्न हुने छ । आज दाङको तुल्सिपुर–घोराहीमा टुर भएको छ । भोली रुकुमकोटमा हुने टुर पुस ८ गते रोल्पाको लिवाङ–सुलिचौरसम्म, पुस ९ गते प्युठानको भिङ्ग्रीदेखि स्वर्गद्वारीसम्म, पुस १० गते विजुवार बरुङ्लादेखि चकचके दरभाङ र भालुवाङसम्म रहने जनाइएको छ ।

साथै, पुस ११ गते कपिलवस्तुको चन्द्रौटा–कृष्णनगर–तौलिहवा–गोरुसिङ्गेसम्म, पुस १२ गते अर्घाखाँचीको सुपादेउराली मन्दिरदेखि सन्धिखर्कसम्म, पुस १३ गते गुल्मीको तम्घासमा, पुस १४ गते पाल्पाको तानसेन बजार, पुस १५ गते नवलपरासीको बर्दघाट–सुनवलसम्म र पुस १५ गते नै रुपन्देहीको भैरहवादेखि लुम्बिनीसम्म टुर गरिनेछ ।लुम्बिनी लायन्सका अनुसार पुस १६ गते बुधवार बुटवलको सिद्धबाबा मन्दिरदेखि ट्राफिक चोकसम्म टुर आयोजना हुनेछ भने मेगा कन्सर्ट पनि आयोजना हुनेछ ।

एनपिएलको दोस्रो संस्करणको फाइनलमा लुम्बिनी लायन्सले सुदूरपश्चिम रोयल्सलाई पराजित गरेको थियो ।