काठमाडौँमा वैशाख १० देखि १९ गतेसम्म सञ्चालन हुने दशौँ प्रधानमन्त्री कप राष्ट्रिय महिला तथा पुरुष भलिबल च्याम्पियनसिपका लागि रुकुम पश्चिमले टोलीको घोषणा गरेको छ । रुकुम पश्चिमले पुरुष तर्फ भाग लिँदै छ । रुकुम पश्चिम भलिबल प्रशिक्षण केन्द्रले डायमन्ड खड्काको कप्तानीमा व्यवस्थापन टिम सहित १६ सदस्यीय टोली घोषणा गरेको हो । 

पिएम कपमा रुकुम पश्चिमको कप्तानी डायमन्ड खड्काले गर्ने छन् । खड्काको कप्तानीमा रहेको टोलीमा ३ जना पाकिस्तानी अन्तर्राष्ट्रिय खेलाडी समेत सामेल छन् । टोलीमा खड्का सहित रोशन खड्का, अजय सुनार, सञ्जुबिक्रम शाह, सन्तोष बिक, हिमाल सुनारी मगर र विवश आले मगर रहेका छन् । 

त्यस्तै पुष्कर धामी, राजन दर्लामी मगर तथा पाकिस्तानबाट फहद राजा, अदनान खान र अफाक खान रहेका छन् । प्रशिक्षकमा तेजविक्रम बुढा, सहायक प्रशिक्षकमा शैलेन्द्र शाही, व्यवस्थापकमा यमन बाँठा मगर र फिजियोमा दुर्गा रेग्मी रहेका छन् । 

गत पुसमा सम्पन्न नवौँ एनभिए कप भलिबलमा सेमिफाइनलसम्मको यात्रा तय गरेको रुकुम पश्चिम भलिबल प्रशिक्षण केन्द्र दशौँ प्रधानमन्त्री कप राष्ट्रिय भलिबल च्याम्पियनसिपका लागि पुरुष तर्फ छनोट भएको थियो । उक्त प्रतियोगितामा तीन पाकिस्तानी खेलाडी माजर अलि, अहमद मुस्तफा र वालिद खान सहित उत्रिएको रुकुम पश्चिम सान्त्वना भएको थियो । 

स्वदेशी खेलाडी सन्तुलित नहुँदा उक्त प्रतियोगितामा सोचेजस्तो प्रदर्शन गर्न नसकेको रुकुम पश्चिमले यस पटक भने विदेशी सहित स्वदेशी खेलाडीमा पनि विशेष ध्यान दिएको देखिएको छ । रुकुम पश्चिमले स्वदेशी खेलाडीमा अधिकांश खेलाडी गण्डकी प्रदेशका भित्र्याएको छ । 

गण्डकीका कप्तान सञ्जुविक्रम शाह सहित हिमाल सुनारी सम्मको उपस्थिति र ३ जना पाकिस्तानी खेलाडीको आगमनले रुकुम पश्चिम यस पटक प्रमुख दाबेदारका रूपमा देखिएको छ । च्याम्पियन बन्ने लक्ष सहित मैदान उत्रिन लागेको प्रशिक्षक तेजविक्रम बुढाले बताउनुभयो । यस पटक उपाधि मै कब्जा जमाउने गरी टिम निर्माण गरिएको उहाँको भनाई छ । 

प्रधानमन्त्री कप भलिबलको विजेताले काभा क्लब भलिबल च्याम्पियनसिपमा सहभागिता जनाउन पाउने व्यवस्था छ । काभा क्लब भलिबल च्याम्पियनसिप अन्तर्राष्ट्रिय प्रतियोगिता हो । काभामा छनोटको मुख्य लक्ष सहित मैदान उत्रिन लागेको बुढाले बताउनुभयो ।