चैत्र ५ गते हुने स्वतन्त्र विद्यार्थी यूनियन (स्ववियु) निर्वाचनका लागि रुकुम पश्चिमका क्याम्पसहरुमा पनि शनिबार मनोनय दर्ता भएको छ । त्रिभुवन विश्व विद्यालय अन्तरर्गतका ७ मध्य क्याम्पस मध्ये ६ क्याम्पसमा शनिबार मनोनयन दर्ता भएको हो । सिम्रुतु क्याम्पसमा भने मनोनयनका लागि आज ४ बजेसम्मको समय तोकिएको छ । मतदाता नामावलीमा विवाद भएपछि शनिबार मनोनयन हुन नसकेको क्याम्पसमा रहेको स्ववियू निर्वाचन समितिले जनाएको छ ।
मनोनयन दर्ता भएका ७ मध्य ३ क्याम्पसमा सर्वसम्मत मनोनयन दर्ता भएको छ । भने ३ क्याम्पसमा छुट्टा छुट्टै उम्मेदवारी परेको सम्बन्धीत क्याम्पसका स्ववियू निर्वाचन समितिले जनाएका छन् ।
सदरमुकाम मुसिकोट खलंगामा रहेको रुकुमेली क्याम्पसमा नेकपा माओवादी केन्द्र निकट अखिल क्रान्तिकारी, नेपाली कांग्रेस निकट नेविसंघ र नेकपा एकीकृत समाजवादी निकट अनेरास्ववियूले छुट्टा छुट्टै मनोनयन दर्ता गराएका छन् । यहाँ नेकपा एमाले निकट अनेरास्ववियूबाट भने केही पदमा स्वतन्त्रमा उम्मेदवारी परेको छ । संगठन दर्ता नभएका कारण स्वतन्त्रबाट उम्मेदवारी परेको बताइएको छ ।
आठबीसकोट नगरपालिकामा रहेको राडीज्युला शिक्षा क्याम्पसमा माओवादी केन्द्र निकट अखिल क्रान्तिकारीका विरुद्ध अन्य संगठन मिलेर उम्मेदवारी दिएका छन् । अखिल क्रान्तिकारीका विरुद्ध नेपाली कांग्रेस निकट नेविसंघ, एमाले निकट अनेरास्ववियू, विप्लव नेतृत्वको नेकपा निकट अखिल क्रान्तिकारी र नेकपा एस निकट अनेरास्ववियूले उम्मेदवारी दिएका छन् ।
चौरजहारी नगरपालिकाको जहारी क्याम्पस खोलागाउँमा अखिल क्रान्तिकारी, नेविसंघ र अनेरास्ववियूले छुट्टा छुट्टै उम्मेदवारी दिएका छन् ।
सानीभेरी शिक्षा क्याम्पस, स्यार्पू बहुमुखी क्याम्पस र शितल क्याम्पसमा भने सर्वसम्मत भएको छ । सानीभेरी गाउँपालिकामा रहेको सानीभेरी शिक्षा क्याम्पसमा नेकपा माओवादी केन्द्र निकट अखिल क्रान्तिकारी र नेपाली कांग्रेस निकट नेविसंघ मिलेर मनोनयन दर्ता गराएका छन् । यहाँ अन्य संगठनबाट मनोनयन नपरेपछि सर्वसम्मत भएको हो ।
चौरजहारी नगरपालिकामा रहेको शितल क्याम्पसमा माओवादी केन्द्र निकट अखिल क्रान्तिकारी र एमाले निकट अनेरास्ववियू मिलेर उम्मेदवारी दिएका छन् । कांग्रेस निकट नेविसंघले असहमति जनाउँदै क्याम्पसमा तालाबन्दी गरेको थियो । क्याम्पसमा रहेको स्ववियू निर्वाचन समितिले सार्वजनिक गरेको उम्मेदवारको अन्तिम नामावली अनुसार यो क्याम्पसमा पनि मतदान गर्नुपर्ने छैन् ।
बाँफिकोट गाउँपालिकामा रहेको स्यार्पू बहुमुखी क्याम्पसमा पनि सर्वसम्मत उम्मेदवारी परेको छ । सर्वसम्मत भएका तीन वटै क्याम्पसमा अध्यक्ष सहित अधिकांश पदाधिकारी अखिल क्रान्तिकारीले नै पाएको छ । त्रिभुवन विश्व विद्यालय अन्तरर्गतका क्याम्पसमा चैत्र ५ गते स्ववियू निर्वाचन हुँदै छ ।
