नेपाल विद्युत् प्राधिकरणको ४० औँ वार्षिकोत्सवको अवसरमा रुकुम पश्चिम वितरण केन्द्रले ब्याडमिन्टन सहित विभिन्न कार्यक्रम गरेको छ । पुरुष डबल तथा सिङ्गल ब्याडमिन्टन, महिला सिङ्गल ब्याडमिन्टन र घैटोफोर तथा कुर्सी रेस प्रतियोगिता आयोजना गरेर वार्षिकोत्सव मनाइएको नेपाल विद्युत् प्राधिकरण रुकुम पश्चिम वितरण केन्द्रले जनाएको छ । 

मुसिकोट नगरपालिका ५ शेरिगाउँमा सञ्चालित कर्मचारी बिचको पुरुष डबल ब्याडमिन्टन प्रतियोगितामा सुनिल बिएम र सालिकराम शर्माको जोडी प्रथम भएको छ । फाइनलमा द्रोणबहादुर शाही र लालबहादुर खाम्चाको जोडीलाई पराजित गर्दै उक्त जोडी प्रथम भएको हो । 

प्रतियोगितामा प्रेमप्रकाश चपाई र सीमान्त राना तथा सुनिल केसी र रोलबहादुर मल्लको जोडी सान्त्वना भएका छन् । पुरुष सिङ्गल तर्फ दीपक रोका प्रथम, सीमान्त राना द्वितीय तथा देवबहादुर नेपाली र दलबहादुर घर्ती सान्त्वना भएको विद्युत् प्राधिकरणका कर्मचारी सुनिल बिएमले जानकारी दिनुभयो । 

महिला सिङ्गल तर्फ भने ज्योति परियार धामी प्रथम हुँदा ललिता केसी खड्का द्वितीय भएको बताइएको छ । वार्षिकोत्सवकै अवसरमा आयोजित घैटोफोरमा घनश्याम केसी प्रथम हुँदा कुर्सी रेसमा कोपिला बुढामगर प्रथम भएको बताइएको छ ।