बास नेपालको २२औँ वार्षिक साधारण सभा तथा सामाजिक परीक्षण कार्यक्रम सम्पन्न भएको छ । जिल्ला समन्वय समिति बाँकेका प्रमुख ज्ञानेन्द्र कुमार चौधरीको प्रमुख आतिथ्यतामा सुशासनको क्षेत्रमा क्रियाशील बास नेपालको वार्षिक साधारण सभा तथा सामाजिक परीक्षण नेपालगन्जमा सम्पन्न भएको हो ।
कार्यक्रममा बोल्दै कार्यक्रमका प्रमुख अतिथि जिल्ला समन्वय समिति प्रमुख चौधरीले बास नेपालले देश भरिनै उत्कृष्ट कार्य गरिरहेको उल्लेख गर्दै बासको अभियानले सामाजिक जागरण फैलिएको बताउनुभयाे । बासले गरेका क्रियाकलापहरूको अनुगमन गरेको स्मरण गर्दै कार्यक्रम अत्यन्तै प्रभावकारी भएको पाएको उहाँले बताउनुभयाे । उहाँले २२औँ साधारण सभाको सफलताको शुभकामना व्यक्त गर्न गर्नुभयाे ।
कार्यक्रममा बोल्दै कार्यक्रमका अतिथि नेपालगन्ज उपमहानगरपालिका प्रमुख प्रशासकीय अधिकृत रामहरि शर्माले सुशासन र सामाजिक जबाफदेहीताका क्षेत्रमा बास नेपालको योगदान प्रशंसनीय रहेको बताउनुभयाे । उहाँले बास नेपालसँग सहकार्य गर्न नेपालगन्ज उपमहानगरपालिका प्रतिबद्ध रहेको बताउनुभयाे ।
कार्यक्रममा बोल्दै खजुरा गाउँपालिकाका निवर्तमान उपाध्यक्ष एकमाया विकले सुशासनको क्षेत्रमा बास नेपालको भूमिका अहम् रहेको बताउनुभयाे । यसै गरी कार्यक्रममा शुभकामना मन्तव्य राख्दै गैर सरकारी संस्था महासङ्घ बर्दियाका पूर्व अध्यक्ष कृष्णजंग शाहले बासका सबल पक्ष धेरै भएकोमा खुसी व्यक्त गर्नुभयाे । उहाँले देश व्यापी अभियानमा युवा परिचालन बासको बलियो पक्ष रहेको बताउनुभयाे ।
बास नेपालका निर्देशक हेमराज भट्टले वार्षिक प्रगति प्रतिवेदन प्रस्तुत गरेको कार्यक्रममा कोषाध्यक्ष धिरेन्द्र शाहीले आर्थिक प्रतिवेदन प्रस्तुत गर्नुभएकाे थियाे ।
कार्यक्रममा बास नेपालका कानुनी सल्लाहकार लोक बहादुर शाह, गैर सरकारी संस्था महासंघ नेपाल बाँकेका सचिव तथा बास नेपालका पूर्व अध्यक्ष रमेश सिटौला लगायत विभिन्न सङ्घसंस्थाका प्रमुख तथा प्रतिनिधिहरूको उपस्थिति थियो ।
बास नेपालका केन्द्रीय महासचिव कल्पना अधिकारीले सञ्चालन गरेको कार्यक्रममा केन्द्रीय निवर्तमान अध्यक्ष लुना बुढाथोकीले स्वागत गर्नुभएको थियाे ।
कार्यक्रममा बास नेपालका कर्मचारी राष्टि बुढा मगर, मिना घर्ती मगर, जमुना चौधरी, शोभा चौधरी, शोभा भण्डारी, सुमिता कुमाल, ज्याेती बुढा र रचना चौधरीले सामूहिक नृत्य प्रस्तुत गर्नुभएकाे थियाे । कार्यक्रममा बास नेपालको २४औँ वार्षिकोत्सवको अवसरमा सम्पन्न कर्मचारी, पदाधिकारी बिचको मैत्रीपूर्ण भलिबल प्रतियोगितामा विजयी हुने टिमका सदस्यहरूलाई प्रशंसा पत्र र मेडल प्रदान गरिएको थियो ।
यसै गरी २०८२ श्रावणमा बर्दियाको ठाकुरद्वारामा सम्पन्न वार्षिक समीक्षा तथा योजना तर्जुमा बैठकमा उत्कृष्ट प्रस्तुतीकरण गर्ने बासका कार्यक्रम अधिकृत रवीन्द्र बोहरा र प्रशासन सहायक मिना घर्ती मगरलाई प्रमाण पत्र प्रदान गरिएको थियो । कार्यक्रमका प्रमुख अतिथि जिल्ला समन्वय समिति प्रमुख ज्ञानेन्द्र कुमार चौधरी र बास नेपालका केन्द्रीय अध्यक्ष शिवकुमार वर्माले उक्त प्रशंसा पत्र र मेडल प्रदान गर्नुभएकाे थियाे ।
उद्घाटन सत्र पश्चात् बास नेपालको २२औँ साधारण सभाको बन्दसत्र सम्पन्न भएको छ । बन्द सत्रमा वार्षिक प्रगति, आर्थिक प्रतिवेदन माथि व्यापक छलफल गर्दै अनुमोदन गरिएको छ । यसै गरी साधारण सभाले यस आर्थिक बर्षको वार्षिक कार्य योजना समेत स्वीकृत गरेको छ ।
केन्द्रीय अध्यक्ष शिव कुमार वर्माको अध्यक्षतामा सम्पन्न बन्दसत्रको सहजीकरण केन्द्रीय महासचिव कल्पना अधिकारीले गर्न गर्नु भएकाे थियाे बन्द सत्र मा बास नेपालका पूर्व केन्द्रीय अध्यक्ष रमेश सिटौला, बाँके शाखा अध्यक्ष रामु चिडिमार लगायतले बोल्नुभएकाे थियाे । कार्यक्रममा १५० बढीको सहभागिता रहेको थियो ।
