रुकुम पूर्वबाट लुम्बिनी प्रदेश सभा सदस्य सरिता पुनको निधन भएको छ । शनिवार त्रिवि शिक्षण अस्पतालमा उपचारको क्रममा मृत्यु भएको नेकपा एमाले रुकुम पूर्वका अध्यक्ष लीलामणि गौतमले जानकारी दिनुभयो ।

३२ वर्षीया सांसद पुन लामो समय देखि मुटु रोगी हुनुन्थ्यो । उहाँको मुटुको भल्भ फेरिएको थियो । उहाँले साउन २२ गते छोरीलाई जन्म दिनुभएको थियो । अप्रेसन मार्फत छोरीलाई जन्म दिएको आधा घण्टामै उहाँको मुटुको पुनः अप्रेसन गर्नुपरेको थियो ।

दुई वटा अप्रेसन भएपछि उहाँको स्वास्थ्य अवस्था थप कमजोर बनेको थियो । त्यसपछि उहाँलाई आइसियु हुँदै भेन्टिलेटरमा राखिएको अध्यक्ष गौतमले जानकारी दिनुभयो । बिचमा एक दिन वार्डमा सारिए पनि पुनः भेन्टिलेटरमा राखिएकोमा शनिवार निधन भएको अध्यक्ष गौतमको भनाई छ ।

छोरीको अवस्था भने सामान्य रहेको बताइएको छ । रुकुम पूर्वको पुथाउत्तरगंगा गाउँपालिका १० कि पुन नेकपा एमालेबाट समानुपातिक कोटाबाट लुम्बिनी प्रदेश सभा सदस्य बन्नुभएको थियो । उहाँको विवाह रुकुम पश्चिमको आठबिसकाेटकाे स्यालाखदीमा भएको थियो ।