रुकुम पश्चिमका प्रमुख जिल्ला अधिकारी दिनेशप्रसाद थानीले जिल्ला कारागारको निरीक्षण गर्नुभएको छ । प्रजिअ थानी, जिल्ला प्रहरी प्रमुख प्रहरी नायव उपरीक्षक प्रमेश विष्ट, प्रमुख अनुसन्धान अधिकृत नेवबहादुर राना लगायतको टोलीले आज बिहान निरीक्षण गरेको हो ।

उक्त टोलीले कारागारको समग्र अवस्था निरीक्षण गरेको छ । निरीक्षण पछि प्रजिअ थानीले जिल्ला कारागारमा क्षमता भन्दा बढी कैदी बन्दी हुँदा भएकाे समस्या बारे जानकार रहेको बताउनुभएको थियो । यसबारेमा मातहतका निकायमा जानकारी गराउने र समस्या हल गर्न पहल भइरहेको बताउँदै उहाँले अबका दिनमा पनि यसमा गम्भीर रहने बताउनुभयो । आफू भर्खरै जिल्ला आएको र जिल्लाका बारेमा बुझ्ने काम गरिरहेको समेत उहाँले बताउनुभयो ।

साथै उहाँले कारागारमा कुनै समस्या भएमा च्यानल मार्फत आफूसम्म पुर्‍याउन कैदी बन्दीहरूलाई आग्रह गर्नुभयो । त्यसमा तत्कालै सहजीकरण गर्ने पनि उहाँले बताउनुभएको थियो । त्यस्तै प्रजिअ थानीले कारागारमा धेरै कैदी बन्दी रहेकोले व्यवस्थापनमा समस्या भइरहेकोले कारागारको व्यवस्थापनमा सहयोग गर्न कैदी बन्दीलाई आग्रह समेत गर्नुभएको थियो । अनुशासन कायम गर्न उहाँको आग्रह थियो ।

जिल्ला कारागारमा क्षमता भन्दा ६ गुणा बढी कैदी बन्दी रहेका छन् । २५ जनाको क्षमता रहेको कारागारमा १ सय ५५ जना कैदी बन्दी रहेका छन् । क्षमता भन्दा अत्यधिक कैदी बन्दी हुँदा व्यवस्थापनमा समस्या रहेको कारागार प्रशासनले जनाएको छ ।