रुकुम पश्चिमको मुसिकोट नगरपालिका वडा नम्बर १ छिङमा पहिरोले पुरिएर एक महिलाको मृत्यु भएको छ । आज बिहान ११ बजेतिर भेडा, बाख्रा लिएर गोठालो जाँदै गरेकी तल्लो छिङकी करिब ६९ बर्सिया हिमकुमारी मल्लको पहिरोले पुरिएर मृत्यु भएको हो । 

एउटा भेडा र एउटा बाख्रा सहित जाँदै गरेको अवस्थामा बाटोमा हिँड्ने क्रममा माथिबाट झरेको पहिरोले पुरेको वडाध्यक्ष ज्ञानुचन्द्र चन्दले जानकारी दिनुभयो । पहिरोले पुर्दा हिमकुमारीको घटना स्थलमै मृत्यु भएको वडाध्यक्ष चन्दले बताउनुभयो । हिमकुमारीसँग रहेको एउटा भेडा र एउटा बाख्रा समेत पहिरोमा पुरिएको मरेको उहाँको भनाई छ । 

९ वटा बाख्रा भने उहाँका नातिले लिएर गएको र उहाँले एउटा बाख्रा र एउटा भेडा लिएर जाँदै गरेको अवस्थामा पहिरोले पुरेको बताइएको छ । हिमकुमारीले आउन ढिला गरेपछि परिवारका सदस्यले खोजी गरेका थिए । खोजी गर्दै जाँदा पहिरोले पुरिएको अवस्थामा फेला पारेको वडाध्यक्ष चन्दको भनाई छ । 

उहाँका अनुसार प्रहरी र स्थानीयले शव निकालेको र अहिले शव घटनास्थलमै रहेको छ ।