गत असोज २० गतेदेखि बेपत्ता रुकुम पश्चिमको मुसिकोट नगरपालिका वडा नम्बर १३ डाँडाछिवाङकी एक युवति मृत फेला परेकी छन् । २५ बर्सिया गङ्गा सार्की असोज २० गते साँझ करिब ५ बजेदेखि बेपत्ता हुनुभएको थियो ।

आज बिहान उहाँ गाउँ देखि १ किलोमिटर टाढाको जङ्गलमा झुन्डिएको अवस्थामा मृत फेला परेको जिल्ला प्रहरी कार्यालय रुकुम पश्चिमका सूचना अधिकारी हरिप्रसाद पुनले जानकारी दिनुभयो ।

उहाँका अनुसार आज बिहान जङ्गल गएका स्थानीयले गन्ध आएपछि खोजी गर्दा रूखमा झुन्डिएको अवस्थामा शव देखेपछि प्रहरीलाई खबर गरेका थिए । शव सडेको अवस्थामा रहेकोले बेपत्ता भएकै दिन झुन्डिएको हुनसक्ने अनुमान गरिएको छ ।

अहिले घटनास्थलमा प्रहरी निरीक्षक पुन सहितको टोली खटिएको छ । शवको मुचुल्का उठाइरहेको र त्यसपछि शव पोस्टमार्टमका लागि जिल्ला अस्पताल ल्याइने उहाँले बताउनुभयो ।

घटनाको अनुसन्धान समेत सुरु गरेको प्रहरीले जनाएको छ ।  रुकुम पूर्वको सिस्ने गाउँपालिका वडा नम्बर ८ माइतीघर भएकी गङ्गा घाँस काट्न भनेर जङ्गल गएको र त्यसपछि सम्पर्क विहीन हुनुभएको थियो ।

गङ्गाले अन्तिम पटक भारतमा रहेका श्रीमानसँग कुरा गरेको र फोनमा सामान्य विवाद समेत भएको बुझिएको बताइएको छ ।