रुकुम पश्चिमको आठबिसकोट नगरपालिकामा करेन्ट लागेर एक युवकको मृत्यु भएको छ । इन्टरनेटको तार जडानका क्रममा करेन्ट लाग्दा वडा नम्बर २ का २२ वर्षीय प्रकाश थापाको मृत्यु भएको जिल्ला प्रहरी कार्यालय रुकुम पश्चिमले जनाएको छ । 

प्रहरीका अनुसार थापालाई वडा नम्बर ३ को हरिबिसौना भन्ने ठाउँमा आज दिउँसो १ बजेतिर करेन्ट लागेको हो । बिजुलीको पोलमा चढेर इन्टरनेटको तार जडानका क्रममा बिजुलीको तारमा छोइदा थापालाई करेन्ट लागेको प्रहरीको भनाई छ । 

करेन्ट लागेर घाइते थापालाई उपचारका लागि जिल्ला अस्पताल सल्ले ल्याइँदै थियो । तर बाटोमै मृत्यु भएको बताइएको छ । रुकुम पश्चिममा इन्टरनेटको तार जडानका क्रममा बर्सेनि ज्यान जाने गरेको छ । प्रहरीले घटनाको थप अनुसन्धान गरिरहेको छ ।