यातायात व्यवस्था सेवा कार्यालय रुकुम पश्चिममा रोकिएको चालक अनुमति पत्र वितरण सेवा सुरु भएको छ । गत भदौ २३ र २४ गते भएको जेन जी आन्दोलनका क्रममा यातायात व्यवस्था विभागको केन्द्रीय सर्भर सिस्टममा क्षति पुगेपछि चालक अनुमति पत्र वितरण सेवा रोकिएको थियो । 

केन्द्रीय सर्भरमा क्षति भई रोकिएका चालक अनुमति पत्र सम्बन्धीका सबै सेवा आजबाट सुचारु भएका यातायात व्यवस्था सेवा कार्यालय चौरजहारीले जनाएको छ । अब नियमित रूपमा सवारी चालक अनुमति पत्र वितरण लगायत सेवाहरू प्रवाह हुने कार्यालय प्रमुख मोहनकुमार केसीले जानकारी दिनुभयो । 

सेवा सुचारु भइसकेकोले आवश्यक सेवा लिन उहाँले सबैलाई अनुरोध समेत गर्नुभएको छ । साथै ट्रायल पास भई रसिद लिन नपाएका सेवाग्राहीहरूले आजै देखि रसिद लिन सक्ने समेत उहाँले बताउनुभयो । छुटेका सेवाग्राहीलाई कार्यालयमा आफै आएर लिन उहाँको आग्रह छ । 

त्यस्तै नयाँ चालक अनुमति पत्रका लागि यसअघि जस्तै वेबसाइटमा गएर फारम भर्न सकिने कार्यालयले जनाएको छ । यस कार्यालयबाट विशेष गरी रुकुम पश्चिम, रुकुम पूर्व, जाजरकोट, सल्यान, डोल्पा, सुर्खेत लगायत ठाउँका नागरिकहरूले सेवा लिइरहेका छन् ।