रुकुम पश्चिमको आठबिसकोट नगरपालिका वडा नम्बर ११ सिमपाखामा मोटरसाइकल र बोलेरो जिप ठोक्किँदा एक जनाको मृत्यु भएको छ । आज आठबिसकोटको राडीबाट चिसापानी आइरहेको जिप र राडी तर्फ गइरहेको मोटरसाइकल ठोक्किँदा मोटरसाइकल चालक जाजरकोटको नलगाड नगरपालिका ८ का ३५ वर्षीय सिताराम चदाराको मृत्यु भएको हो । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरिप्रसाद पुनका अनुसार दुर्घटनामा गम्भीर घाइते चदाराको आठबिसकोट नगर अस्पतालमा उपचारका क्रममा मृत्यु भएको हो । उक्त मोटरसाइकलमै सवार अन्य २ जना घाइते भएका छन् । 

घाइते हुनेमा नलगाड नगरपालिका ८ जाजरकोटका १६ वर्षीय नवराज चदारा र आठबिसकोट नगरपालिका ९ का १४ वर्षीय कमल सुनार रहेको प्रहरी निरीक्षक पुनले जानकारी दिनुभयो । उनीहरूको अवस्था मध्यम रहेको उहाँले बताउनुभयो । उनीहरूको आठबिसकोट नगर अस्पतालमा उपचार भइरहेको छ । 

मोटरसाइकलमा तीन जना सवार रहेका थिए । प्रहरी निरीक्षक पुनका अनुसार क.प्र. ०३००१ ह ०९२० नम्बरको मोटरसाइकल अनियन्त्रित भएर लु १ ज ४५७९ नम्बरको बोलेरो जिपमा ठोक्किन पुगेको प्रारम्भिक अनुसन्धानबाट खुलेको छ ।

यसअघि मृतककाे नाम र माेटरसाइकल नम्बर फरक परेकाेले सच्याइएकाे छ-सम्पादक