रुकुम पश्चिमको मुसिकोट नगरपालिका वडा नम्बर ३ धैरेनीचौरमा निर्माणाधीन खेल मैदान खेल्न लायक बनेको छ । निर्माणको काम पूर्ण रूपमा नसकिए पनि खेल्न लायक बनेको हो । पछिल्लो पटक मुसिकोट नगरपालिकाले करिब ५ लाख खर्च गरेर खेल मैदानलाई खेल्न लायक बनाएको हो । 

यसै मैदानमा मंसिर ७ देखि ११ गतेसम्म मुसिकोट नगरपालिका स्तरीय राष्ट्रपति रनिङ शिल्ड सञ्चालन भएको छ । यो खेल मैदान निर्माणको काम पहिलो स्थानीय तहको पालामै सुरु भएको थियो । तर वर्षौँ सम्म खेल मैदान निर्माणको कामले पूर्णता पाउन सकिरहेको छैन । बितेको आर्थिक वर्षमा मैदानको काम सक्ने गरी १ करोड ५० लाखमा ठेक्का लागेको थियो । 

तर ठेकेदार कम्पनीले करिब ६० प्रतिशत मात्र काम गरेर छाडेको वडाध्यक्ष दशरथ केसीले बताउनुभयो । उहाँका अनुसार स्टामेट अनुसार काम भएको भए यति बेला तोकिए अनुसार मैदान सम्म्याउने, प्याराफिट निर्माण र गेट निर्माणको काम भइसकेको हुन्थ्यो । ठेकेदारले तोकिए अनुसार काम गर्न नसेपछि बजेट समेत पुरै खर्च हुन नसकेको उहाँले बताउनुभयो । 

पछिल्लो पटक नगरपालिकाको करिब ५ लाख खर्चमा माटो भरेर आधा मैदान सम्म्याउने काम भएको वडाध्यक्ष केसीको भनाई छ । मैदानको कुल लम्बाइ १ सय ४० मिटर र लम्बाइ १ सय ३० मिटर रहेको छ । अहिले मैदानको चौडाइ लगभग आइसकेको छ भने लम्बाइ ९३ मिटर रहेको उहाँले बताउनुभयो । 

अब मैदानको २७ मिटर जति लम्बाई निकाल्न बाँकी रहेको उहाँको भनाई छ । अन्य संरचना निर्माण गरेर मैदान १ सय २० मिटरको गोलाइमा रहने उहाँले बताउनुभयो । यस मैदानमा हालसम्म ४ करोड १५ लाख बढी रकम खर्च भइसकेको छ । 

अघिल्लो सरकारका पालमा जग्गा खरिद लगायत गरी एक पटक ७० लाख र अर्को पटक ७५ लाख गरी झन्डै एक करोड खर्च भएको र आफूहरू सरकारमा आएपछि पटक पटक गरेर ३ करोड २० लाख जति खर्च भइसकेको वडाध्यक्ष केसीले जानकारी गराउनुभयो । यो सबै बजेट सङ्घ र केही बजेट नगरपालिकाको रहेको बताइएको छ । 

कुल ३२ करोड ७४ लाखमा निर्माण सम्पन्न हुने गरी ५ वर्ष अघि यस मैदानको डिजाइन स्टामेट भएको थियो । स्टामेट अनुसार काम हुन धेरै नै बजेट आवश्यक हुने भए पनि खेल्न मिल्ने बनाउने गरी भने केही रकम खर्च गरे पुग्ने उहाँले बताउनुभयो । यो मैदान क्रमागत शीर्षकमा सङ्घीय अर्थ मन्त्रालयमा इन्ट्री भइसकेपनि बजेट भने सुनिश्चित नभएको नगरपालिकाले जनाएको छ । 

मैदानको पूर्णताका लागि पहल भइरहेको नगरपालिकाको भनाई छ । ३ नम्बर वडाध्यक्ष केसीका अनुसार यो वर्षको जिल्ला स्तरीय राष्ट्रपति रनिङ शिल्ड मुसिकोटले आयोजना गर्ने जिम्मेवारी पाएकामा आगामी माघसम्म बजेटको व्यवस्था गरी मैदानको बाँकी रहेको काम पूरा गर्ने गरी लागिरहेको बताउनुभयो । 

बजेट व्यवस्थापन भएमा एक, २ महिनामा काम सकेर खेल्न मिल्ने बनाउन सकिने उहाँले बताउनुभयो । यसका लागि नगरपालिका तथा वडाले समेत सङ्घ र प्रदेश सरकार समक्ष पहल गरिरहेको उहाँको भनाई छ । यो मैदानको काम सम्पन्न भएमा ठुला खेलकुद प्रतियोगिताहरू सञ्चालन गर्न टेवा पुग्ने विश्वास गरिएको छ ।