जेन–जी आन्दोलनका घाइतेहरूलाई जिल्ला प्रशासन कार्यालय रुकुम पश्चिमले दोस्रो पटक सम्पर्क गर्न अनुरोध गरेको छ । आज एक सूचना जारी गर्दै जिल्ला प्रशासन कार्यालयले गत भदौ  २३ र २४ गते भएको जेन–जी प्रदर्शन घाइते भएका व्यक्तिहरुलाई सम्पर्कमा आउनु अनुरोध गरेको हो ।  गत कार्तिक २८ गते पहिलो पटक ७ दिने सूचना  प्रकाशित गरिएकामा उक्त अवधिमा कुनै पनि व्यक्ती सम्पर्कमा नआएकाले पुनः दोस्रो पटक ३ दिनको सूचना प्रकाशित गरिएको प्रमुख जिल्ला अधिकारी दिनेशप्रसाद थानीले जारी गरेको सूचनामा उल्लेख गरिएको छ । 

आन्दोलनको क्रममा तत्कालीन सरकारी पक्ष र प्रदर्शनकारी बिच भएको झडप, भिडन्त एवं बल प्रयोगको क्रममा घाइते भएका व्यक्तिहरूको अवस्थाको स्पष्ट र वैज्ञानिक मूल्याङ्कन तथा अभिलेखीकरण गरी उपचार, राहत वितरण तथा तथ्याङ्क व्यवस्थापन गर्न घाइते भएका व्यक्तिहरूको चोटपटकको गम्भीरता अनुसार वर्गीकरण गर्नुपर्ने भएकोले  स्वयं व्यक्तिले आवश्यक कागजात सहित उक्त प्रदर्शन तथा आन्दोलनको क्रममा घाइते भएका व्यक्तिले जिल्ला प्रशासन कार्यालय स्वयं उपस्थित हुन अनुरोध गरिएको छ । जिल्लामा भने जेन–जी आन्दोलनका क्रममा कुनै घटना घटेको थिएन ।