रुकुम उद्योग वाणिज्य सङ्घले अहिलेको विषम परिस्थितिमा कालोबजारी र कृत्रिम अभाव सिर्जना नगर्न रुकुम पश्चिमका व्यवसायीहरूलाई अनुरोध गरेको छ । 

मध्यपूर्वमा देखिएको युद्धको कारण जिल्लामा बाहिरबाट आयातित वस्तुहरू आयतमा कमी हुन गई केही वस्तुहरूको सहज आपूर्तिमा समस्या हुन गएकोले यस विषम परिस्थितिमा कोही कसैले कालोबजारी तथा कृत्रिम अभाव सिर्जना, नगर्न जिल्ला स्थित थोक तथा फुटकर व्यवसायीहरूलाई सङ्घले अनुरोध गरेको हो । 

असहज अवस्थामा कालोबजारी र कृत्रिम अभाव सिर्जना गरेमा कानुनको भागीदार हुने सङ्घका अध्यक्ष पलबहादुर खड्काले स्मरण समेत गराउनुभएको छ । यस्ता गतिविधि भएको थाहा पाएमा सङ्घको कार्यालयमा जानकारी गराउन आम उपभोक्ताहरूलाई उहाँले आग्रह गर्नुभएको छ । 

त्यस्तै सङ्घले स्थानीय ऊर्जाको प्रयोग गर्न समेत जिल्लावासीमा अनुरोध गरेको छ । यस विषम परिस्थितिमा मितव्ययी तरीकाले स्थानीय ऊर्जा लगायतका वस्तुहरू उपभोग गर्न अनुरोध छ, सङ्घले भनेको छ । अहिले बजारमा विशेष गरी ग्यासको माग बढ्दो छ । 

आपूर्ति कम भएको अवस्थामा बजारमा कालोबजारी र कृत्रिम अभाव हुनसक्ने र यसबाट उपभोक्ताहरू ठगिने जोखिम रहेको अवस्थामा सङ्घले व्यापारीहरूलाई सचेत बनाएको अध्यक्ष खड्काले बताउनुभयो । अमेरिका र इजरायलले इरानमा आक्रमण गरेपछि नेपालमा पनि त्यसको सिधा प्रभाव परेको छ ।