रुकुम पश्चिमको मुसिकोट नगरपालिकामा १० दिने निःशुल्क योग शिविर सुरु भएको छ । मुसिकोट नगरपालिका, आयुर्वेद औषधालयको आयोजनामा खलङ्गाको बाल मन्दिरमा शिविरको उद्घाटन गरिएको हो । आज बिहान १ कार्यक्रमका बिच नगर प्रमुख महेन्द्र केसीले शिविरको उद्घाटन गर्नुभएको हो । 

शिविर १० दिनसम्म बाल मन्दिरमै सञ्चालन हुने छ । योग अभ्यासको प्रचार गर्ने, योग अभ्यास गराउने, सकारात्मक जीवन शैली व्यवस्थापन सम्बन्धी ज्ञान दिने र आहार विहार प्रवद्र्धन तथा योग ध्यानमा आकर्षित गर्ने उद्देश्यले वार्षिक स्वीकृत कार्यक्रम अनुसार शिविर आयोजना गरिएको औषधालयका वरिष्ठ कविराज निरीक्षक राजेन्द्र केसीले जानकारी दिनुभयो । 

समग्रमा मानिसहरूलाई स्वस्थ बनाउने लक्ष रहेको उहाँले बताउनुभयो । औषधालयले हरेक वर्ष यस्ता कार्यक्रमहरू सञ्चालन गर्दै आइरहेको उहाँले बताउनुभयो । यो कार्यक्रम पछि मुसिकोट ५ शेरिगाउँमा पनि शिविर सञ्चालन हुने उहाँको भनाई छ । आज पहिलो दिन ६० जना बढीको सहभागिता रहेको थियो । 

हरेक दिन बिहान पौने ५ बजेदेखि ७ बजेसम्म शिविर सञ्चालन हुने बताइएको छ । शिविरमा प्रशिक्षकका रूपमा महिला पतञ्जलि योग समितिका अध्यक्ष दीपा केसी रहनुभएको छ । शिविरको उद्घाटन गर्दै नगर प्रमुख केसीले योगले शारीरिक सहित मानसिक रूपमा तन्दुरुस्त बनाउने भएकोले योगको महत्त्व धेरै रहेको बताउनुभएको थियो । 

योगका धेरै फाइदा रहेकोले प्रत्येक नागरिकहरूले योग गर्नुपर्ने उहाँको भनाई छ । योगलाई प्रचार गर्नका लागि नगरपालिकाले विशेष ध्यान दिएको उहाँले बताउनुभयो । नगर प्रमुख केसीको अध्यक्षतामा भएको उद्घाटन कार्यक्रममा नगरपालिकाका प्रमुख प्रशासकीय अधिकृत गौरीप्रसाद आचार्य लगायतको उपस्थिति रहेको थियो । कार्यक्रमको सञ्चालन वरिष्ठ कविराज निरीक्षक केसीले गर्नुभएको थियो ।