रुकुम पश्चिमका सबै उम्मेदवारले निर्वाचन खर्च विवरण बुझाएका छन् । फागुन २१ गतेको निर्वाचनमा विभिन्न पार्टीबाट उम्मेदवार बनेका सबैले तोकिएकै समय सीमा भित्र निर्वाचन खर्च विवरण बुझाएको जिल्ला निर्वाचन कार्यालयले जनाएको छ । 

जिल्लामा १२ जना उम्मेदवार रहेकामा सबै उम्मेदवारहरूले तोकिएको समयमै निर्वाचन खर्च विवरण बुझाएको जिल्ला निर्वाचन अधिकारी मोहनलाल केसीले जानकारी दिनुभयो । केहीले आफैले खर्च विवरण बुझाएको र केहीलाई भने समयमै खर्च विवरण बुझाउन ताकेता गर्नुपरेको उहाँले बताउनुभयो । 

मतगणना सम्पन्न भएको ३० दिनभित्र सबै उम्मेदवारहरूले जिल्ला निर्वाचन कार्यालयमा निर्वाचन खर्च विवरण बुझाएको उहाँको भनाई छ । जिल्लामा एक जना उम्मेदवारले अधिकतम ३१ लाख खर्च पाउने निर्वाचन आयोगले व्यवस्था गरेको थियो । परिधि भित्र खर्च गरेको उम्मेदवारले बुझाएको विवरणमा उल्लेख रहेको केसीले बताउनुभयो । 

जिल्लामा १२ दलका उम्मेदवारले निर्वाचन लडेका थिए । नेपाल कम्युनिस्ट पार्टीका गोपाल शर्मा अनल विजयी हुनुभएको थियो । उहाँको निर्वाचन खर्च १५ लाख ५ हजार २ सय ५० रहेको खर्च विवरणमा उल्लेख छ । जिल्लामा सबैभन्दा बढी खर्च प्रगतिशील लोकतान्त्रिक पार्टीका उम्मेदवार जनार्दन शर्मा प्रभाकरको देखिएको छ । 

उहाँले निर्वाचनमा २८ लाख २५ हजार खर्च गरेको उल्लेख गरिएको छ । उहाँ निर्वाचनमा भने तेस्रो हुनुभएको थियो । दोस्रो बन्नुभएका नेपाली काँग्रेसका राजु केसीको निर्वाचन खर्च २२ लाख १९ हजार ३० रुपैयाँ रहेको जिल्ला निर्वाचन कार्यालयमा बुझाइएको उहाँको खर्च विवरणमा उल्लेख छ । 

रास्वपाका मानबहादुर शाहीको खर्च ७ लाख ६३ हजार, नेकपा एमालेका नन्दराम देवकोटाको १ लाख १५ हजार ४ सय, राष्ट्रिय जनमोर्चाका सत्यनारायण श्रेष्ठको २३ हजार ८ सय ५५, उज्यालो नेपालका नरेन्द्र केसीको १ लाख ६७ हजार र नेमकिपाका धनबहादुर विकको निर्वाचन खर्च ९ हजार ५ सय देखिएको छ ।

त्यस्तै राष्ट्रिय प्रजातन्त्र पार्टीका गोपाल खड्काको खर्च २ लाख, नेकपा माओवादीका चन्द्रबहादुर बुढाको खर्च ३ लाख ४५ हजार, नेकपा संयुक्तका शेरबहादुर केसीको खर्च ४० हजार र आम जनता पार्टीका प्रेमा दमाई नेपालीको निर्वाचन खर्च १ लाख ८० हजार ६ सय ५० भएको खर्च विवरणमा उल्लेख गरिएको छ ।

प्रतिनिधि सभा सदस्य निर्वाचन ऐन २०७४ को दफा ७२ तथा आयोगद्वारा स्वीकृत निर्वाचन आचारसंहिता बमोजिम खर्च विवरण बुझाउनुपर्ने हुन्छ ।