रुकुम पश्चिमको आठबिसकोट नगरपालिकामा जिप दुर्घटना भएको छ । आठबिसकोट नगरपालिका वडा नम्बर ९ राडी बजारबाट मैडाँडा जाँदै गरेको ग १ च ५२१३ नम्बरको बोलेरो जिप वडा नम्बर ९ को सुन्दरपानी स्थित भित्री सडक खण्डमा मंगलबार बेलुकी ५ः१५ बजेतिर दुर्घटना भएको हो । 

सडकको भित्तामा ठोक्किएर भएको दुर्घटनामा १२ जना घाइते भएको जिल्ला प्रहरी कार्यालय रुकुम पश्चिमका प्रमुख प्रहरी नायव उपरीक्षक वेदबहादुर पौडेलले जानकारी दिनुभयो । सुरुमा १९ जना घाइते भएको विवरण आए पनि प्रहरी घटना स्थलमा पुगेर मुचुल्का तयार पार्दा १२ जना घाइते देखिएको प्रहरीले जनाएको छ । 

चालक सानीभेरी गाउँपालिका ४ का २६ वर्षीय नरेन्द्र बिक फरार रहेको र खोजी भइरहेको डिएसपी पौडेलले बताउनुभयो । गाडी धनी आठबिसकोट नगरपालिका ८ का हरिबहादुर गैरे भने प्रहरीको सम्पर्कमा रहेको उहाँको भनाई छ । घाइतेहरूको नगर अस्पताल राडीमा उपचार भइरहेको उहाँले जानकारी गराउनुभयो । 

दुर्घटनामा घाइते हुनेहरूमा आठबिसकोट नगरपालिका १० की ४५ बर्सिया जसि दमाई, वडा नम्बर ८ का १६ वर्षीय भूपेन्द्र सत्याल, सोही ठाउँका २३ वर्षीय महेन्द्र गैरे, वडा नम्बर १० की ५९ बर्सिया धनकुमारी सार्की, वडा नम्बर ८ की २६ बर्सिया नन्दकली पुन र सोही वडाका २५ वर्षीय पूर्णबहादुर सार्की रहेको डिएसपी पौडेलले बताउनुभयो । 

त्यस्तै आठबिसकोट नगरपालिका वडा नम्बर ९ की ३५ बर्सिया सुशीला नेपाली, वडा नम्बर ८ का ११ वर्षीय ओमप्रकाश घर्ती, वडा नम्बर १० की ६२ बर्सिया कैली नेपाली, वडा नम्बर ८ की ६० बर्सिया मिना घर्ती, सोही वडाका ६१ वर्षीय मनबहादुर बस्याल र वडा नम्बर १० की १७ बर्सिया सीता बिक पनि घाइते भएको उहाँले बताउनुभयो । 

घाइते मध्ये जसि, भूपेन्द्र र महेन्द्रकाे अवस्था गम्भीर रहेकाे बताइएकाे छ ।