चाडपर्वका समयमा काठमाडौँसहित विभिन्न स्थानबाट गृह जिल्ला रुकुम पश्चिम आउने यात्रुको सहज, सुरक्षित र व्यवस्थित आवागमन सुनिश्चित गर्ने उद्देश्यले रुकुमेली सेवा समाज र रुकुम जिल्लामा यातायात सेवा सञ्चालन गर्दै आएका व्यवसायीका प्रतिनिधिहरूबिच छलफल सम्पन्न भएको छ ।

काठमाडौँको नयाँ बसपार्कमा सम्पन्न छलफलमा रुकुमेली सेवा समाजका संयोजक अधिवक्ता दिनेश खड्का, सदस्यहरू लोकेन्द्र खनाल, खिमप्रकाश बुढामगर तथा यातायात व्यवसायी हेमराज विक र प्रजित बुढामगरलगायतको सहभागिता रहेको थियो ।

छलफलका क्रममा चाडपर्वका समयमा रुकुम पुग्ने यात्रुको बढ्दो चाप, टिकट व्यवस्थापन, वैकल्पिक सवारीसाधनको उपलब्धता तथा यात्रुहरूले भोग्नुपर्ने सम्भावित समस्याका विषयमा समीक्षा गरिएको थियो ।

काठमाडौँ-रुकुम लामो दूरीको यात्राका क्रममा यात्रुहरूमा आउन सक्ने स्वास्थ्यसम्बन्धी समस्या तथा अन्य चुनौतीको व्यवस्थापन गर्न प्रत्येक बसलगायतका सवारीसाधनमा प्राथमिक उपचारका आवश्यक सामग्री राख्ने विषयमा छलफल भएको थियो ।

त्यसै गरी, बाटोमा यातायात अवरुद्ध भई यात्रुहरू अलपत्र पर्ने अवस्था आएमा उनीहरूका लागि आपत्कालीन खानपान तथा पिउने पानीको व्यवस्था गर्न सम्बन्धित यातायात व्यवसायी र रुकुमेली सेवा समाजबिच सहकार्य गर्ने विषयमा समेत छलफल भएको छ ।

रुकुम पुग्नका लागि टिकट नपाएका यात्रुहरूको विवरण सङ्कलन गरी आवश्यकताअनुसार थप सवारीसाधनको व्यवस्था गर्ने तथा यातायात खर्चको अभावमा अलपत्र परेका यात्रुहरूलाई रुकुमेली सेवा समाज र यातायात व्यवसायीले आवश्यक सहयोग तथा सहजीकरण गर्ने सहमति भएको छ ।

यस व्यवस्थाले विशेष गरी चाडपर्वका समयमा घर जान चाहेर पनि टिकट नपाएका तथा आर्थिक अभावका कारण यात्रा गर्न नसकेका रुकुमेली नागरिकलाई राहत पुग्ने अपेक्षा गरिएको छ ।

टिकट नपाएर समस्यामा परेका यात्रुहरूलाई आवश्यक सहयोग तथा सहजीकरणका लागि यातायात व्यवसायी हेमराज विकको मोबाइल नम्बर ९८४४९४६२९९ मा सम्पर्क गर्नसमेत रुकुमेली सेवा समाजले अनुरोध गरेको छ ।

रुकुमेली सेवा समाजले चाडपर्वका अवसरमा गृह जिल्ला जाने रुकुमेली नागरिकको यात्रा सहज, सुरक्षित र व्यवस्थित बनाउन यातायात व्यवसायीलगायत सम्बन्धित सरोकारवालासँग समन्वय तथा सहकार्यलाई निरन्तरता दिने जनाएको छ ।