रवि केसी उमेरले ३२ वर्षको हुनुभयो । आठबीसकोट नगरपालिका ९ नम्बर वडाका स्थायी बासिन्दा केसी सोही नगरको नगरप्रमुखको दौडमा हुनुहुन्छ । नेकपा माओवादी केन्द्रले वैशाख ३० गते हुने स्थानीय तहको निर्वाचनमा पार्टीको तर्फबाट केसीलाई नै नगरप्रमुखको उम्मेदवार बनाएको छ । २०४६ सालको फागुन ४ गते जन्मिएका केसी सम्भव त कर्णाली प्रदेशमा नगर प्रमुखको उम्मेदवारमा सबभन्दा कान्छा हुनुहुन्छ । पार्टीले सर्वसम्मत केसीलाई नगरप्रमुखको उम्मेदवार बनाउने निर्णय गरेको थियो । त्यसपछि रवि प्रचार प्रसारमा हुनुहुन्छ । उहाँले टिकट पाएपछि युवाहरु उत्साहि छन् । प्रचार प्रसारमा युवा आकर्षण छ । तन्नेरीले गर्छन् भन्ने आशामा मतदाताहरु देखिएका छन् । युवा र अरु वयस्क पनि नगरको नेतृत्व तन्नेरीले लिनुपर्छ राजनीतिमा युवा आउनुपर्छ भन्नेमा थिए र छन् पनि । यसैमा रविको पार्टीले यस निर्वाचनका लागि रविलाई नगरप्रमुखको उम्मेदवारको रुपमा अघि सारेको छ ।
पार्टीले पत्याएका युवा
राजनीतिक दलले युवालाई मान्दैनन् । अवसर दिँदैनन् । सबै जिम्मा बुढा पाकाले मात्रै लिन्छन् भन्ने मान्यता छ । तर रविलाई उहाँको पार्टीले पत्याएको छ । युवाले गर्छन र गर्न सक्छन् भन्ने विश्वास दिलाएका कारण एक जना तन्नेरीले नगरप्रमुखको उम्मेदवारमा पार्टीले सिफारिस गरेको हो । रवि अर्थात युवालाई पार्टीले पहिलो पटक यस्तो अवसर दिएको होइन । रवि पार्टीको आठबीसकोट नगर समितिको पनि अध्यक्ष हुनुहुन्छ । त्यस अघि पार्टीको नगर सचिवको जिम्मेवारी वहन गरिसक्नुभएका रवि हाल पार्टीको नगर अध्यक्ष हुनुहुनछ । २०७८ सालको मंसिरमा भएको नगर सम्मेलनले रविलाई सर्वसम्मत अध्यक्षमा चयन गरेको थियो । त्यस अघि उहाँ पार्टीको सचिवको भूमका हुनुहुन्थ्यो । ‘हाम्रो पार्टीले युवालाई अवसर नदिएको होइन, यो अवसर दिएको पहिलो पटक पनि होइन ठाउँ, क्षेत्र र अवस्था अनुसार हामी युवाहरुले अवर पाइरहेका छौं,’ उहाँले भन्नुभयो, ‘युवाले गर्न सक्छन् भनेर पार्टीले पत्याइरहेको छ ।’
विद्यार्थीबाटै राजनीतिमा
रवि विद्यार्थीकालबाटै राजनीतिमा लाग्नुभएको हो । आफूले माध्यामिक तहसम्मको अध्ययन गरेको बालकल्याण माध्यामिक विद्यालयमा विद्यार्थी संगठनमा आवद्ध भएर रविले राजनीति सुरु गर्नुभएको थियो । विद्यार्थी संगठनमा आवद्ध भएर विद्यालयका विकृति, विसंगति, लपारबाही सच्च्याउने र राम्रो गर्ने अभियान रविले विद्यालय तहबाटै थाल्नुभएको थियो । राजनीतिमा लागेको जोडिएको १६ वर्षमा रवि आठबीसकोट नगरपालिकाको प्रमुखको उम्मेदवार बन्नुभएको छ । रविले पहिलो पटक २०६२ बाल कल्याण माविसको इकाई सचिवको जिम्मेवारी लिनुभएको थियो । त्यसपछि उहाँ निरन्तर राजनीतिमै हुनुहुन्छ । लामो समय उहाँ विद्यार्थी राजनीतिमा रहनुभयो । २०६३ सालमा सुर्खेत क्याम्पस शिक्षामा अखिल क्रान्तिकारीको इकाई सदस्य, २०६५ सचिव र २०६६ मा क्याम्पस इकाइको अध्यक्ष बन्नुभएको थियो ।
सोही समयमा उहाँ अखिल क्रान्तिकारी जिल्ला समिति सुर्खेतको सदस्य, सह सचिव र सचिव समेत बनेर संगठनमा काम गर्नुभयो । अखिल क्रान्तिकारी सुर्खेतको अध्यक्षमा निर्वाचनमा लडेपनि उहाँ निर्वाचित हुनु भएन । त्यसपछि गृह जिल्लामा फर्किएका केसी माओवादी केन्द्रको जिल्ला सम्मेलन आयोजक समिति सदस्य बन्नुभयो । आठबीसकोट नगरको सदस्य तथा पार्टीको जिल्ला सचिवालय सदस्य हुँदै उहाँ एमाले माओवादीको एकताको क्रममा माओवादीको तर्फबाट नगर सचिव बन्नुभयो । पार्टी अलग बनेपछि फेरि उहाँ माओवादी केन्द्रको नगर सचिव नै बन्नुभयो । त्यसपछि पार्टीले उहाँलाई पार्टीको नगर अध्यक्ष बनायो । गत मंसिर यता उहाँले आठबीसकोट नगरको माओवादी केन्द्रको नेतृत्व गरिरहनुभएको छ । माओवादीको नगर समितिमा पनि अधिकांश युवा छन् । युवालाई पार्टीले अवसर र दुवै जिम्मेवारी दिएको उहाँले बताउनुभयो । युवाले गर्न सक्छन् भन्ने पार्टी र सरका दुवै ठाउँबाट देखाउने चुनौती युवामा रहेको युवाले गरेर पनि देखाउने विश्वास उहाँमा छ ।
आर्थिक समृद्धि र विकासमा जोड
रवि केसी नेतृत्वमा ७० जनाको उम्मेदवार मैदानमा छन् । ७२ उम्मेदवारमध्य २ जना यस अघि नै निर्विरोध निर्वाचित भइसक्नुभएको छ । यो टिमले नगर तथा नगरबासीको आर्थिक समृद्धि र विकासमा जोड दिने बताएको छ । चुनावी प्रतिबद्धता पत्र सहित निर्वाचनमा गएको यो केसी नेतृत्वको टोलीले आर्थिक उपार्जनमा सबैलाई जोडि आर्थिक समृद्धि र विकासलाई प्राथमिकतामा राखेको छ । विशेष गरी कृषि र पशुपालन, फलफूल मार्फत नगरलाई समृद्धितर्फ लैजान सकिने विश्वास उहाँको छ । दुध तथा दुग्धजन्य पदार्थको प्रशोधन, फलफूलको प्रशोधन तथा निर्यातलाई मुख्य प्राथमिकतामा राखिएको छ । नगरपालिका यसका लागि उपयुक्त क्षेत्र, माटो भएकाले पनि यसतर्फ लाग्ने प्रतिबद्धता गरिएको उहाँले बताउनुभयो । वन पैदवारको उपयोग गरी यसलाई पनि आर्थिक स्रोतसँग जोड्ने योजना प्रतिबद्धता पत्रमा उल्लेख छ ।
गरीबीको रेखामुनि रहेका नगरबासीलाई लक्षित गरी विशेष परियोजना बनाई सञ्चालन गरी कम्तिमा पनि १२ महिना खान पुग्ने, औषधोपचार र अरु आधारभुत आवश्यक्ता परिपुर्तिको व्यवस्थापन गर्ने घोषणा यो माओवादी केन्द्रले गरेको छ । आर्थिक, सांस्कृतिक, पर्यटनको विकासमा विशेष ध्यान लाइने, सिस्ने राउण्डलाई पूरा गर्ने, चित्रिपाटन, मौराखारा, शाइकुमारी, काँडादह,आत्रेयऋषि, कोट, मैडाँडा, बञ्चरे तथा साततले गुफाको पर्यटकीय विकासमा जोड दिने उल्लेख छ । शैक्षिक गुणस्तरका लागि भौतिक पूर्वाधार निर्माणका प्रयासलाई निरन्तरता दिने, राडीज्युला शिक्षा क्याम्पसलाई आंगिक बनाउने घोषणा गरिएको छ । नगर अस्पतालको सेवा र सुविधालाई बढाउने घोषणा गरिएको छ । सबै वडामा बाह्रै महिना चल्ने गरी सडकको स्तरोन्नती गर्ने, राडीज्युला र सिमबजारमा सहरी पूर्वाधार विकास कार्यक्रम चलाउने पनि प्रतिबद्धतामा उल्लेख गरिएको छ ।
भूमीहिन तथा सुकुम्बासीलाई भूमीको व्यवस्थापन गर्ने र लालपुर्जा प्रदान गर्ने घोषणा पनि गरिएको छ । भेरीकरिडोर अन्तर्गतका सडकको कालोपत्रे गर्न प्रयास गर्ने, स्यालाखदी, गोतामकोटका घना वस्तिलाई ग्रामिण वस्ति विकासमा रुपान्तरण गर्ने पनि उल्लेख छ । जनयुद्धका सहिद परिवार, घाइते, अपांग लक्षित विशेष कार्यक्रम सञ्चालन गर्ने, नगरभर विद्युतिकरणलाई २ वर्षभित्र सम्पन्न गर्ने, इलाका प्रहरी कार्यालयको भवन निर्माणका लागि पहल गर्ने जस्ता घोषणा पनि रवि केसीले गर्नुभएको छ । भेरी नदिको किनार तथा खोलाहरुमा तटबन्ध गर्न ढिलाई नगर्ने, बाढी, पहिरो, हावाहुरी जस्ता प्राकृतिक प्रकोपबाट सर्वसाधारणको सम्पती सुरक्षाको काम गर्ने र कम भन्दा कम क्षेती कसरी हुन्छ त्यसतर्फ ध्यान दिने पनि घोषणा पत्रमा उल्लेख छ ।
