कर्म फ्लाइट्सद्धारा विद्यालयलाई पुस्तकालय, विद्यार्थीलाई छात्रवृत्ति

समाज

Home
समाज
कर्म फ्लाइट्सद्धारा विद्यालयलाई पुस्तकालय, विद्यार्थीलाई छात्रवृत्ति

कर्म फ्लाइट्सद्धारा विद्यालयलाई पुस्तकालय, विद्यार्थीलाई छात्रवृत्ति

कखरा संवाददाता बिहीबार, असार १६, २०७९

विद्यालयलाई पुस्तकालय हस्तान्तरण कार्यक्रम ।

विगत पाँच वर्षदेखि रुकुमको पूर्व पुथाउत्तरगंगा गाउँपालिकाका विभिन्न विद्यालय र विद्यार्थीका समस्यालाई सम्बोधन गर्दै आएको पोखरास्थित कर्म फ्लाइट्स फाउन्डेसनले विद्यार्थीलाई छात्रवृत्ति वितरण र विद्यालयमा पुस्तकालय स्थापना गरिदिएको छ । वडा नम्बर ५ हुकामको बाल कल्याण आधारभूत विद्यालय उज्र्याङमा असार १ गते, वडा नम्बर ९ को आदर्श मावि खारबाङ्गमा असार २ गते, वडा नम्बर ४ को आधारभूत विद्यालय अर्जलमा असार २ गते र वडा नम्बर २ को आधारभूत विद्यालय हार्दिबाङ्गमा असार ३ गते पुस्तकालय स्थापना गरी हस्तान्तरण गरिएको छ ।

फाउन्डेसन मार्फत ३ लाख २८ हजार बराबरको पुस्तकालय हस्तान्तरण गरिएको हो । पुस्तकालय पाएपछि विद्यालयहरुले फाउण्डेशनलाई धन्यवाद दिएका छन् । त्यस्तै फाउण्डेशनले हरेक वर्ष जस्तै यो वर्षपनि आफन्तजन छात्रवृत्ति कार्यक्रम अन्तरगत विद्यार्थीहरुलाई छात्रवृत्ति प्रदान गरेको छ । वडा नम्बर ६ मयाङको जनजागृति आधारभूत विद्यालयका १६ जना विद्यार्थीलाई वर्षभरी पुग्ने शैक्षिक सामग्री वितरण गरिएको छ । वडा नम्बर १ मैकोटको पुथा हिमालय माविका ३० जना गरिब तथा जेहेन्दार विद्यार्थीलाई वार्षिक शैक्षिक सामग्री तथा नगद वितरण गरिएको छ ।

जनजागृत्ति आधारभूत विद्यालय मषाङ र पुथा हिमालय मावि मैकोटका ४६ जना विद्यार्थीलाई आफन्तजन छात्रवृत्ति कार्यक्रमबाट ७ लाख बराबरको शैक्षिक सामग्री तथा नगद वितरण गरिएको कर्म फ्लाइट्सका कार्यकारी सदस्य तथा रुकुम पूर्वका कार्यक्रम संयोजक कर्मसही घर्ती मगरले जानकारी दिनुभयो । कर्म फ्लाइट्सका फिल्ड कोर्डिनेटर राजु दास, संयोजक घर्ती मगर र भोलेन्टियर फ्रान्सेली नागरिक ट्रिष्टको अगुवाइमा पुस्तकालय तथा छात्रवृत्ति प्रदान गरिएको हो ।

प्रकाशित मिति: बिहीबार, असार १६, २०७९ १४:५८