मंसिर ४ गते भएको प्रतिनिधि र प्रदेश सभाको निर्वाचनमा रुकुम पूर्वबाट उम्मेदवार भएका ६ जनाले खर्च विवरण बुझाएका छन् । प्रतिनिधि सभाका ६ र प्रदेश सभाका १२ जना गरी कुल १८ जना उम्मेवार रहेकामा अहिलेसम्म ६ जनाले जिल्ला निर्वाचन कार्यालयमा निर्वाचन खर्च बुझाएका हुन् ।
निर्वाचन खर्च बुझाउनेमा प्रतिनिधि सभाका ३ जना र प्रदेश सभाका तीन जना रहेका छन् । जिल्ला निर्वाचन कार्यालयका अनुसार प्रतिनिधि सभा तर्फ नेकपा एमालेका कैलाशकुमार मल्ल, राप्रपाका खिमबहादुर खत्री र नेश्नलिष्ट पिपल्स पार्टीका बलबहादुर बुढाले खर्च विवरण बुझाएका छन् ।
निर्वाचन कार्यालयमा वुझाएको खर्च विवरण अनुसार उनिहरु मध्य एमालेका मल्लको खर्च ३ लाख ८६ हजार ५ सय ८५ रुपैंया, राप्रपाका खत्रीको १ लाख २५ हजार ४० रुपैंया र नेश्नलिष्ट पिपल्सका बुढाको खर्च २ लाख ४६ हजार ४० रुपैंया जिल्ला निर्वाचन कार्यालयका सूचना अधिकारी हर्कबहादुर शाहीले जानकारी दिनुभयो ।
त्यस्तै प्रदेश सभा तर्फ निर्वाचन क्षेत्र नम्बर १ का उम्मेदवार तेजबहादुर ओलीले मात्र खर्च विवरण बुझाएको उहाँले बताउनुभयो । ओलीले कार्यालयमा बुझाएको विवरणमा उहाँको चुनाव खर्च १८ लाख ९५ हजार ७ सय १५ रुपैंया देखिएको सूचना अधिकारी शाहीको भनाई छ । यो क्षेत्रमा निर्वाचन आयोगले अधिकतम १९ लाख रुपैंयासम्म खर्च गर्न पाउने अधिकार दिएको थियो ।
प्रदेश सभा निर्वाचन क्षेत्र नम्बर २ तर्फ दुई जनाले खर्च विवरण बुझाएका छन् । खर्च विवरण बुझाउनेमा नेपाली कांग्रेसबाट निर्वाचित धनबहादुर केसी र नेकपा एमालेका उम्मेदवार भावना बिसी रहनुभएको छ । निर्वाचनमा विजय हाँसिल गरेका केसीले आफ्नो चुनाव खर्च १३ लाख २ हजार ५ सय २७ रुपैंया ४२ पैसा रहेको विवरण बुझाएको निर्वाचन कार्यालयले जनाएको छ ।
एमालेकी उम्मेदवार बिसीले आफ्नो खर्च ३ लाख ६० हजार ४५ रुपैंया रहेको विवरण बुझाउनुभएको छ । निर्वाचन आयोगले रुकुम पूर्व प्रतिनिधि सभा तर्फ बढीमा २७ लाख र प्रदेश सभा तर्फ निर्वाचन क्षेत्र नम्बर १ मा १९ लाख तथा निर्वाचन क्षेत्र नम्बर २ मा १७ लाख रुपैंयासम्म खर्च गर्न पाउने अधिकार दिएको थियो ।
बुझाउन बाँकी उम्मेदवार को को छन् ?
एक प्रतिनिधि र दुई प्रदेश सभा रहेको रुकुम पूर्वमा कुल १८ जना उम्मेदवार रहेकामा अब १२ जनाले खर्च विवरण बुझाउन बाँकी रहेको जिल्ला निर्वाचन कार्यालय रुकुम पूर्वले जनाएको छ । खर्च विवरण बुझाउन बाँकी मध्य प्रतिनिधि सभा सदस्यमा निर्वाचित नेकपा माओवादी केन्द्रका पूर्णबहादुर घर्ति र प्रदेश सभा १ मा निर्वाचित स्वतन्त्र उम्मेदवार सुरुल पुन लगायत रहनुभएको छ ।
खर्च विवरण बुझाउ बाँकी अन्यमा प्रतिनिधि सभा तर्फ मंगोल नेशनल अर्गनाइजेशनका रतनबहादुर बुढा र स्वतन्त्र उम्मेदवार चन्द्रराज झाँक्री रहनुभएको छ । त्यस्तै प्रदेश सभा अन्तरगत निर्वाचन क्षेत्र नम्बर १ मा नेकपा एमालेका तेजेन्द्र बुढामगर, मंगोल नेशनल अर्गनाइजेशनका पुरा पुन र स्वतन्त्र उम्मेदवार दुतकुमार पुनमगर रहनुभएको छ ।
प्रदेश सभा निर्वाचन क्षेत्र नम्बर २ मा मंगोल नेशनल अर्गनाइजेशनका लेखन बुढा, राप्रपाका केशवचन्द्र समाल, स्वतन्त्र उम्मेदवारहरु केशव रावल, नरहरी खड्का र पूर्णजंह सिंहले निर्वाचन खर्च विवरण बुझाउन बाँकी रहेको जिल्ला निर्वाचन कार्यालयका सूचना अधिकारी शाहीले बताउनुभयो । चुनाव लडेका उम्मेदवारले अन्तिम मत परिणाम सार्वजनिक भएको ३५ दिन भित्र चुनाव खर्च निर्वाचन कार्यालयमा बुझाउनुपर्ने व्यवस्था छ ।
1675054956.jpg)
