रुकुम पूर्वबाट मंसिर ४ को प्रतिनिधि सभा र प्रदेश सभा सदस्य चुनाव लडेका मध्ये १७ जना उम्मेदवारले चुनाव खर्च विवरण बुझाएका छन् । जिल्लामा १८ जना उम्मेदवार रहेकामा १७ जनाले कार्यालयमा निर्वाचन खर्च विवरण बुझाएको जिल्ला निर्वाचन कार्यालय रुकुम पूर्वले जनाएको छ । 

जिल्लामा ६ जना प्रतिनिधि सभा सदस्य र १२ जना प्रदेश सभा सदस्यका लागि चुनाव लडेका थिए । अव प्रदेश सभा निर्वाचन क्षेत्र नम्बर १ का स्वतन्त्र उम्मेदवार दुतकुमार पनुले मात्र चुनाव खर्च विवरण बुझाउन बाँकी रहेको जिल्ला निर्वाचन अधिकारी तेजकुमार ओलीले जानकारी दिनुभयो । 

जिल्ला निर्वाचन कार्यालयमा बुझाएको खर्च विवरण अनुसार प्रतिनिधि सभामा विजयी नेकपा माओवादी केन्द्रका पूर्णबहादुर घर्तीको खर्च २१ लाख ३९ हजार ६ सय ९ रुपैंया देखिएको छ । प्रतिनिधि सभाका अन्य उम्मेदवार मध्ये नेकपा एमालेका कैलाशकुमार मल्लको खर्च ३ लाख ८६ हजार ५ सय ८५ र राप्रपाका खिमबहादुर खत्रीको खर्च १ लाख २५ हजार ४० रहेको छ । 

त्यस्तै मंगोल नेशनल अर्गनाइजेशनका रतनबहादुर बढाको खर्च ९६ हजार ४ सय १०, नेश्नलिष्ट पिपल्स पार्टीका बलबहादुर बुढाको २ लाख ४६ हजार ४० र स्वतन्त्र उम्मेदवार चन्द्रराज झाँक्रिले १ लाख ४६ हजार खर्च गर्नुभएको छ । प्रदेश सभा तर्फ निर्वाचन क्षेत्र नम्बर १ मा विजयी स्वतन्त्र उम्मेदवार सुरुल पुनले ५ लाख १० हजार १ सय २५ रुपैंया खर्च गर्नुभएको छ । 

अन्य उम्मेदवार मध्ये नेकपा माओवादी केन्द्रका तेजबहादुर ओलीले १८ लाख ९५ हजार ७ सय १५, नेकपा एमालेका तेजेन्द्र बुढा मगरले ५ हजार र मंगोल नेशनल अर्गनाइजेशनका पुरा पुनले ८५ हजार ६५ रुपैंया खर्च भएको विवरण कार्यालयमा बुझाएको जिल्ला निर्वाचन अधिकारी ओलीले बताउनुभयो । उहाँका अनुसार प्रदेश सभा २ मा निर्वाचित नेपाली कांग्रेसका धनबहादुर केसीको चुनाव खर्च १३ लाख २ हजार ५ सय २७ देखिएको छ । 

यो क्षेत्रमा चुनाव लडेका अन्य उम्मेदवारहरु मध्ये नेकपा एमालेका भावना बिसीको खर्च ३ लाख ६० हजार ४५, राप्रपाका केशवचन्द्र समालको खर्च ८४ हजार ४ सय, मंगोल नेशनल अर्गनाइजेशनका लेखन बुढाको खर्च ७९ हजार ८ सय ३५, स्वतन्त्र उम्मेदवारहरु केशव रावलको खर्च ५ लाख ६६ हजार ५ सय, नरहरि खड्काको खर्च १२ लाख ५० हजार ६ सय ९० र पूर्णजंग सिंहको खर्च ५ हजार रहेको विवरण जिल्ला निर्वाचन कार्यालयमा प्राप्त भएको छ । 

जिल्लाका लागि निर्वाचन आयोगले प्रतिनिधि सभा तर्फ बढीमा २७ लाख र प्रदेश सभा तर्फ निर्वाचन क्षेत्र नम्बर १ मा १९ लाख तथा निर्वाचन क्षेत्र नम्बर २ मा बढीमा १७ लाख रुपैंयासम्म खर्च गर्न पाउने गरी सिमा तोकेको थियो । निर्वाचनको अन्तिम परिणाम सार्वजनिक भएको ३५ दिनभित्र उम्मेदवारहरुले निर्वाचन खर्च जिल्ला निर्वाचन कार्यालयमा बुझाउनुपर्ने व्यवस्था छ ।