जिल्ला प्रहरी कार्यालय रुकुम पश्चिमले फागु पूर्णीमा अर्थात होली पर्व सभ्य र मर्यादित तरिकाले मनाउन अनुरोध गरेको छ । एक सूचना जारी गर्दै प्रहरीले मर्यादित रुपमा होली पर्व मनाउन जिल्लावासीलाई अनुरोध गरेको हो ।
होली पर्वको अवसरमा शुभकामना ब्यक्त गर्दै होलीमा हुनसक्ने संभावित घटनाप्रति सजग र सतर्क भई आफु र अन्य ब्यक्तिहरुको सुरक्षाको ख्याल राख्न जिल्ला प्रहरी कार्यालयले अनुरोध गरेको छ ।
होली पर्व मनाउँदा सामाजिक सद्धभाव कायम राख्न, आत्मिय सम्बन्ध, नजिक भएका व्यक्ति वा आफन्तसंग मात्र होली खेल्न, लुटपाट, स्न्याचिङ, चोरी, पकेटमारी जस्ता गतिविधिहरु प्रति सचेत रहन पनि जिल्ला प्रहरी प्रमुख प्रहरी नायव उपरीक्षक नमराज भट्टराइले आग्रह गर्नुभएको छ ।
महिला बालबालिका जेष्ठ नागरिक र अशक्त व्यक्तिको सम्मान गर्न, होली खेल्ने क्रममा महिला हिंसा तथा दुव्र्यवहार हुन सक्ने हुँदा सचेत हुन, मादक पदार्थ सेवन गरी रङ दल्ने जस्ता क्रियाकलाप नगर्न, कुनै पनि व्यक्तिको इच्छा बिपरित रङ दल्ने, पानी छ्याप्ने, लोला हाल्ने र होली खेल्न बाध्य नबनाउन, छाला र आँखामा असर गर्ने खालका केमिकल रङको प्रयोग नगर्न पनि प्रहरीले सचेत गराएको छ ।
त्यस्तै होली पर्व मनाउने क्रममा जुवा तास, लंगुर बुर्जा जस्ता सट्टा बाजी राखेर खेलिने कुनैपनि खेलहरु नखेल्न, झै झगडा गर्ने, जातीय, धार्मिक एवं साँस्कृतिक द्धन्द फैलाउने र उच्छृङखल गतिबिधिहरु नगर्न पनि प्रहरीले जिल्लावासीलाई अनुरोध गरेको छ ।
होली पर्व मनाउदा कुनै पनि अपराधिक क्रियाकलाप भएमा प्रहरी कन्ट्रोल रुम १००, ०८८–५३०१८७, ९८५७८९०५५० नम्बरहरुमा सम्पर्क गर्न समेत जिल्ला प्रहरी कार्यालय रुकुम पश्चिमले सबैमा अनुरोध गरेको छ ।
