रुकुम पश्चिमको मुसिकोट नगरपालिकामा अनुमति बिना संचालन भइरहेको अटो दुर्घटना भएको छ । दुर्घटनामा परी ६ जना घाइते भएका छन् । वडा नम्बर ५ को सेरिगाउँ देखि वडा नम्बर १४  को खेता कुना तर्फ जाँदै गरेको रा १ ह ७१९९ नम्बरको अटो सेरिगाउँ नेपाल विद्युत प्रधिकरणको वितरण केन्द्र नजिकै अनियन्त्रित भएर दुर्घटना भएको जिल्ला प्रहरी कार्यालय रुकुम पश्चिमले जनाएको छ । 

अटो सडक देखि करिब १५ मिटर तल खसेको प्रहरीको भनाई छ । अटो दुर्घटनामा परी अटो चालक मुसिकोट १४ लोरीवाङका अन्दाजी ३२/३३ वर्षिय रोशन बिष्ट, सोही ठाउँका ३८ वर्षिय बिर्खबहादुर बिष्ट र ३७ वर्षिया सरिता ओली बिष्ट, मुसिकाेट ३ पिपलनेटाकी ३६ वर्षिया खीमा खड्का केसी, सानीभेरी गाउँपालिका ९ सिम्लीका २३ वर्षिय रणबहादुर बिष्ट तथा उहाँकी छोरी ६ वर्षिया सपना बिष्ट घाइते भएको जिल्ला प्रहरी प्रमुख प्रहरी नायव उपरीक्षक नमराज भट्टराईले जानकारी दिनुभयो । 

घाइते मध्य खीमा खड्का मुसिकाेट ३ की वडा सदस्य समेत हुनुहुन्छ । डिएसपी भट्टराइका अनुसार घाइते मध्य चालक रोशन बिष्ट र खीमा खड्काको अवस्था गम्भिर छ । उहाँ वेहोस अवस्थामा रहेको डिएसपी भट्टराइले बताउनुभयो । अन्यको अवस्था भने सामान्य रहेको उहाँको भनाई छ । घाइतेहरुको जिल्ला अस्पतालमा उपचार भइरहेको छ । केही घाइतेलाई लिन भने हेलिकोप्टर बोलाइएको मुसिकोट नगर प्रहरी प्रमुख उमेश केसीले बताउनुभयो । 

उहाँका अनुसार आज दुर्घटनामा परेको अटो दर्ता बिना नै संचालन भएको पाइएको छ । मुसिकोट नगरपालिकाले नगरका विभिन्न रुटमा २४ वटा अटो संचालनका लागि एक महिना अघि मात्र अनुमति दिने निर्णय गरेको थियो । जसअनुसार फागुन २९ गतेदेखि अटो सेवाको उद्घाटन गरिएको थियो । त्यसबेला १९ वटा अटो ल्याइएको थियो । तर नगरपालिकाको अटो तथा इ–रिक्सा कार्यविधि अनुसार २०२२ मोडल भन्दा अघिका अटो संचालन गर्न नपाइने भएकोले २०२२ भन्दा अघिका सबै अटो नगरपालिकाले फिर्ता गरेको नगर प्रहरी प्रमुख केसीले बताउनुभयो । 

उहाँका अनुसार अहिलेसम्म जम्मा २ वटा अटोले मात्र नगरपालिकाबाट संचालन अनुमति लिएका छन् । तर नगरपालिकामा अहिले २ भन्दा बढी अटो संचालन भइरहेका छन् । आज दुर्घटनामा परेको अटो नगरपालिकामा दर्ता नभएको केसीले बताउनुभयो ।