पूर्व अर्थमन्त्री तथा प्रतिनिधि सभा सदस्य जनार्दन शर्मा प्रभाकर गत वैशाख २४ गते राप्ती राजमार्ग अन्तर्गतको पितिवाङ खोलामा पुग्नुभयो । खोलामा वर्षौँ देखि पुल निर्माण कार्य अलपत्र अवस्थामा रहेको र पुल नहुँदा वर्षा याममा बर्सेनि जिल्लावासीले सास्ती खेपिरहेको अवस्थालाई मध्यनजर गर्दै पुल निर्माणको पछिल्लो अवस्थाबारे बुझ्न उहाँ प्रमुख जिल्ला अधिकारी, सडक डिभिजन कार्यालय चौरजहारीका प्रतिनिधि, पत्रकार, सुरक्षाकर्मी लगायतलाई साथमा लिएर खोलामा पुग्नुभएको थियो । त्यस क्रममा उहाँले पुल निर्माणको काम सम्पन्न गर्न ठेकेदारका प्रतिनिधि लेकवीर घर्तीलाई निर्देशन दिँदै पुल निर्माण छिटो सम्पन्न होस भनेर आफूले गरिरहेको पहलका बारेमा पनि सुनाउनुभएको थियो । ‘म यो पुल निर्माण छिटो सम्पन्न होस भनेर लागिरहेको छु, यो पुल नबन्नुमा मलाई नै दोषी देखिएको छ, यसले केही गरेन भनिएको छ, यहाँको प्रतिनिधि भएको हिसाबले त्यो पनि ठिकै हो तर पुल छिटो निर्माण होस भनेर नलागेको भने होइन, उहाँले भन्नुभयो ।’ 

यो पुलका मुख्य ठेकेदार चितवनका केशव लामिछानेलाई आफूले बारम्बार फोन गरेर छिटो काम सक्न भनिरहेको प्रसङ्ग पनि उहाँले सुनाउनुभएको थियो । ‘केशव लामिछाने, उहाँ काँग्रेस चितवनको नेता पनि हो मैले उहाँलाई बारम्बार फोन गरेर तुरुन्त पुल निर्माणको काम सक्नुहोस् भनेको छु, शर्माले भन्नुभयो–तपाईँले पुल नबनाउने हो भने म रुकुमका जनतालाई ल्याएर तपाइको घरमा धर्ना बस्न आउँछु समेत भनेँ ।’ लामिछानेले आफूलाई पुल तुरुन्तै निर्माण गर्ने पटक पटक आश्वासन दिएको प्रसङ्ग समेत उहाँले त्यस क्रममा सुनाउनुभएको थियो । ‘मैले प्रत्येक हप्ता उहाँलाई फोन गरेर तुरुन्त पुल निर्माण गर्नुहोस् भनिरहेको छु, उहाँले हुन्छ दाइ म गरिहाल्छु, मान्छे पठाइहाल्नु भन्नुहुन्छ, तर यहाँ कामै भइरहेको छैन’ उहाँले भन्नुभयो । 

यो पुल निर्माणको जिम्मा संरक्षण निर्माण सेवाले लिएको छ । पछिल्लो पटक थप गरिएको समय अनुसार यो पुल २०७८ को वैशाख ८ मा सक्नुपर्ने थियो । २०७४ सालको असार ८ मा ५ करोड २८ लाखमा पुल निर्माणका लागि संरक्षण निर्माण सेवासङ सम्झौता भएको थियो । पहिलो पटक निर्धारित समयमा काम नसकिएपछि पटक पटक गरेर म्याद थप्दा पनि पुल निर्माणको काम सकिएको छैन । अहिलेसम्म पुलको एक साइडको वेसमात्र निर्माण भएको छ । १२ नम्बर क्षेत्रमा वेस निर्माण भएको वर्षौ भइसक्दा पनि ११ नम्बर वडा तर्फ काम हुन सकेको छैन । यो क्षेत्रमा बर्खा अघि सरिया बिछ्याइएको थियो । तर काम भने हुन सकेन । 

यो खोलामा पुल नहुँदा बर्सेनि जिल्लावासीले सास्ती खेप्नुपरेको छ । हरेक वर्ष वर्खायाममा खोला बढ्दा सवारी साधन तथा स्थानीयलाई खोला वारपार गर्न समस्या हुने गरेको छ । आइतबार खोलामा आएको बाढीका कारण यो वर्ष पनि आवतजावत बन्द भएको छ । खोला वारपारका लागि सहज होस भनेर अस्थायी रुपमा निर्माण गरिएको कल्भर्टमा क्षति पुग्दा आइतबार अपराह्न देखि आवतजावत रोकिएको थियो । अझै आवागमन सहज हुन सकेको छैन ।