रुकुम पश्चिमको बाँफिकोट गाउँपालिका वडा नम्बर ३ मा आयाेजित महिला, पुरुष भलिबल प्रतियोगिता सम्पन्न भएको छ । असोज ११ गते देखि सञ्चालन भएको भलिबल प्रतियोगिता शनिबार सम्पन्न भएको हो । १३ औँ स्यार्पु महोत्सवको अवसरमा वडा युवा तथा खेलकुद विकास समिति बाँफिकोट ३ ले शुद्ध खुला वडा स्तरीय भलिबल प्रतियोगिताको आयोजना गरेको थियो । रुकुम पश्चिम र पूर्वका १६ टिमले प्रतिस्पर्धा गरेको पुरुष भलिबल तर्फ सानीभेरी गाउँपालिका वडा नम्बर ४ प्रथम भएको छ ।

शनिवार भएको फाइनलमा बाँफिकोट गाउँपालिका वडा नम्बर २ लाई ३/२ को सेटमा पराजित गर्दै सानीभरी ४ प्रथम भएको हो । प्रथम भएको सानीभेरी ४ ले नगद १ लाख पाँच हजार रुपैयाँको साथमा कप मेडल र प्रमाणपत्र प्राप्त गरेको छ । दोस्रो भएको बाँफिकोट २ ले नगद ७५ हजार रुपैयाँको साथमा मेडल प्रमाणपत्र पाउँदा तेस्रो भएको बाँफिकोट ८ ले नगद ४५ हजार रुपैयाँको साथमा मेडल र प्रमाण पत्रमा चित्त बुझाएको छ ।

यस्तै ९ टिमको  सहभागिता रहेको महिला भलिबल तर्फ बाँफिकोट ४ प्रथम भएको छ । फाइनलमा बाँफिकोट ३ लाई पराजित गर्दै बाँफिकोट ४ प्रथम भएको हो । प्रथम भएको बाँफिकोट ४ ले नगल ४० हजार रुपैयाँको साथमा कप मेडल र प्रमाणपत्र प्राप्त गरेको छ । यस्तै दोस्रो भएको बाँफिकोट ३ ले नगद ३० हजार रुपैयाँको साथमा मेडल र प्रमाणपत्र पाउँदा तेस्रो भएको बाँफिकोट २ ले नगद २० हजार रुपैयाँको साथमा मेडल र प्रमाणपत्र हात पारेको छ ।