अमेरिकामा भएको कार दुर्घटनामा एक रुकुमेली सहित दुई जनाको मृत्यु भएको छ । अमेरिकाको भर्जिनियामा शुक्रवार बिहान भएको कार दुर्घटनामा परी २ जनाको मृत्यु हुँदा २ जना घाइते भएका छन् । मृत्यु हुनेमा रुकुम पश्चिमको आठबिसकोट नगरपालिका वडा नम्बर ७ का सुरेश केसी रहेको बताइएको छ ।

मृतक अर्का एक जनाको भने सनाखत हुन सकेको छैन । सुरेश केही महिना अघि मात्र अवैध बाटो हुँदै अमेरिका पुगेका थिए । कारमा चालक सहित चार जना नेपाली सवार रहेको बताइएको छ । कार चालक ३० वर्षीय विजय तामाङलाई प्रहरीले नियन्त्रणमा लिएको छ । चालक तामाङ सहित कारमा सवार अर्का व्यक्ति घाइते रहको र उपचार चलिरहेको बताइएको छ । कार रुखमा ठोकिएर दुर्घटनामा परेको हो ।