स्थानीय तह पुनःसंरचनापश्चात् पहिलोपटक देशभरका नगरपालिका तथा गाउँपालिकामा निमित्त प्रमुख प्रशासकीय अधिकृतको सङ्ख्या शून्यमा झारिएको छ । सङ्घीय मामिला तथा सामान्य प्रशासन मन्त्रालयका अनुसार यसअघि १०५ नगरपालिका र ८६ गाउँपालिका निमित्त प्रमुख प्रशासकीय अधिकृतले सञ्चालन गरेका थिए । अव भने प्रमुखले नै संचालन गर्ने छन् । सामान्य प्रशासन मन्त्रालयले सार्वजनिक गरेको सूचना अनुसार रुकुम पश्चिमको चौरजहारी नगरपालिका र  मुसिकोट नगरपालिकाले उपसचिव सरहको  प्रमुख प्रशासकीय अधिकृत पाएको छ । 

चौरजहारी नगरपालिकामा प्रेम सुवेदी र मुसिकोट नगरपालिकामा यमकान्त पाण्डेलाई सरुवा गरिएको छ ।  सुवेदी मुख्य मन्त्री तथा मन्त्रिपरिषद्को कार्यालय गण्डकी प्रदेश र पाण्डे मुख्य मन्त्री तथा मन्त्रिपरिषद्को कार्यालय लुम्बीनी प्रदेशमा कार्यरत हुनुहुन्छ । दुवै जना उपसचिव हुनुहुन्छ । मुसिकोट नगरपालिका प्रमुख प्रशासकीय अधिकृतले संचालन गरेपनि  चौरजहारी नगरपालिका भने निमित्त प्रमुखको भरमा संचालन थियो ।  त्यस्तै आठविकोट नगरपालिका पनि विगत केही वर्षदेखि निमित्तकै भरमा संचालन हुँदै आएको छ मन्त्रालयले  नगरपालिका र गाउँपालिका निमित्त प्रमुख शून्य भनेपनि प्रमुख प्रशासकीय अधिकृत खटाएको छैन् । सानीभेरी, त्रिवेणी गाउँपालिका र बाँफिकोट गाउँपालिका भने यस अघिदेखि नै प्रमुख प्रशासकीय अधिकृतले संचालन गरिरहेका छन् ।

सम्पूर्ण स्थानीय तहमा दरबन्दीअनुरुप प्रमुख प्रशासकीय अधिकृत खटाइएकाले पूर्ण जिम्मेवारीसहितको प्रशासनिक नेतृत्व सुनिश्चित भएको सामान्य प्रशासनमन्त्री भगवती न्यौपानेका बताउनुभएको छ । उहाँका अनुसार निजामती सेवा ऐन, २०४९ अनुसार अवकाशको चरणमा रहेका कर्मचारीबाहेक, मन्त्रालयले पारदर्शिता, कार्यकुशलता र भौगोलिक क्षेत्रको अनुभव दिलाउने गरी प्रमुख प्रशासकीय अधिकृत नियुक्त गरेको हो । दुई वर्षभन्दा बढी मन्त्रालय वा मातहतका निकायमा काम गरेका, उपत्यका केन्द्रित कार्यालयमा सीमित, स्थानीय तहमा काम नगरेका, प्रदेशमा कामकाजका लागि खटिएका तथा अतिरिक्त समूहमा रहेका कर्मचारीलाई प्राथमिकतामा राखिएको छ । पहिलोपटक गाउँपालिका तथा नगरपालिकामा निमित्त प्रमुख प्रशासकीय अधिकृतको व्यवस्था शून्यमा झार्नुका साथै बाह्य राजनीतिक दबाब वा स्थानीय तहको मनपरि अन्त्य गरी मन्त्रालयले खटाएका प्रमुख प्रशासकीय अधिकृत अनिवार्य रूपमा सम्बन्धित स्थानीय तहमा काम गर्ने वातावरण सिर्जना भएको मन्त्रालयले जनाएको  । 

मन्त्रालयले दरबन्दीअनुसार प्रमुख प्रशासकीय अधिकृत खटाएको हुँदा यसअघि निमित्त प्रमुख प्रशासकीय अधिकृतलाई दिइएको आर्थिक वा प्रशासनिक जिम्मेवारी स्वतः रद्द भएको छ । साथै कर्मचारी सरुवामा हुने बाह्य प्रभाव अन्त्य भएको छभने चक्रिय सरुवा प्रणाली कार्यान्वयन सहज भएको छ । सुगम स्थानमा मात्र सेवा गर्ने प्रवृत्ति पनि रोकिने मन्त्री न्यौपानेले विश्वास व्यक्त गर्नुभयो । दुर्गम क्षेत्रमा सेवाको पहुँच विस्तार, प्रशासनिक न्यायको अनुभूति, सेवा प्रवाहको गति र कार्यकुशलतामा वृद्धि, सुशासन प्रवद्र्धन, जनप्रतिनिधिबाट प्रमुख प्रशासकीय अधिकृतभन्दा व्यक्तिविशेष रोज्ने प्रवृत्ति अन्त्य हुने उहाँले बताउनुभयो ।