रुकुम पश्चिमको मुसिकोट नगरपालिकाले प्लास्टिकका मालामा प्रतिबन्ध लगाएको छ । शुक्रवार बसेको नगर कार्यपालिकाको ५४ औँ बैठकले नगरपालिकाभरमा प्लास्टिकका मालामा प्रतिबन्ध लगाउने निर्णय गरेको हो ।
स्थानीय फूलका मालालाई प्रवर्द्धन गर्ने उद्देश्यले बजारमा पाइने प्लास्टिकका मालामा प्रतिबन्ध लगाइएको नगर प्रमुख महेन्द्र केसीले जानकारी दिनुभयो । चाडपर्व नजिकिँदै गरेको अवस्थामा नगरपालिकाले प्लास्टिकका मालामा प्रतिबन्ध लगाएको हो ।
चाड पर्वहरूमा बजारमा प्लास्टिकका माला छ्यापछ्याप्ती हुने अवस्थालाई रोक्ने र सयपत्री, हजारी, मखमली लगायत स्थानीय फूलका मालालाई प्रवर्द्धन गर्ने उद्देश्यले यस्तो निर्णय गरिएको नगर प्रमुख केसीको भनाई छ ।
विशेष गरी तिहारमा प्लास्टिकका मालाको बढी प्रयोग हुने गरेको छ । बजारमा ठुलो मात्रामा प्लास्टिकका माला आउँदा ठुलो रकम बाहिरिने अवस्थालाई समेत रोक्न र नगरमै फूलको खेतीलाई बढाई नगरवासीको आर्थिक स्रोतमा समेत सुधार ल्याउन यो निर्णयले सहयोग पुग्ने उहाँको विश्वास छ ।
अब मुसिकोट नगरपालिकाका मुख्य बजार खलङ्गा, बागबजार, सल्ले, शेरिगाउँ सहित नगरभरका कुनै पनि ठाउँमा प्लास्टिकका माला ल्याउन पाइने छैन । निर्णय विपरीत भएमा कारबाही हुने नगरपालिकाले चेतावनी दिएको छ ।
सदरमुकाम समेत रहेको मुसिकोट नगरपालिकामा ठुलो मात्रामा प्लास्टिकका माला भित्रिने गरेकोमा नगरपालिकाले यो निर्णयलाई कसरी पूर्ण रूपमा कार्यान्वयन गर्छ भन्ने बारेमा भने चासोपूर्वक हेरिएको छ ।
