रुकुम पश्चिमको बाँफिकोट गाउँपालिका वडा नम्बर १० घर भई हाल मुसिकोटमा बस्ने एक युवकले आफ्नो जन्मदिनको अवसरमा विद्यालय र आश्रमलाई सहयोग गरेका छन् ।
आभास चन्द ठकुरीले आफ्नो जन्मदिनको अवसरमा मुसिकोट १ सल्लेको बुद्ध भूमि मानव सेवा आश्रम र बाँफिकोट गाउँपालिका १० को एकता आधारभूत विद्यालय ठाँटीलाई सहयोग गर्नुभएको हो ।
आश्रममा चामल, दाल, अण्डा र चाउचाउ लगायतका खाद्यान्न सामग्री सहयोग गरेको उहाँले बताउनुभयो । आश्रममा रहेका आश्रित व्यक्तिहरूको सहजताका लागि सहयोग गरेको उहाँले बताउनुभयो ।
जन्मदिनमा हुने अनावश्यक खर्चलाई रोकेर आश्रमलाई सहयोग गरेको उहाँको भनाई छ । आश्रममै गएर आश्रमका अध्यक्ष खम्बप्रसाद जैसीलाई उक्त सामग्री हस्तान्तरण गरिएको हो ।
त्यस्तै आफूले अध्ययन गरेको बाँफिकोट गाउँपालिका १० ठाँटीमा रहेको एकता आधारभूत विद्यालयमा अध्ययनरत गरिब तथा जेहनदार विद्यार्थीहरूलाई कापी, कलम लगायत शैक्षिक सामग्री सहयोग गरेको ठकुरीले बताउनुभयो ।
कक्षा १–५ सम्मका ३५ जना बालबालिकाहरूलाई शैक्षिक सामग्री प्रदान गरेको उहाँको भनाई छ । कापी तथा कलमको जोहो गर्न समस्यामा रहेका गरिब तथा जेहनदार बालबालिकालाई सहज होस भनेर सहयोग गरेको उहाँको भनाई छ ।
