सुर्खेत— कर्णाली प्रदेशका भौतिक पूर्वाधार तथा शहरी विकास मन्त्री मिलन खड्का रोकाले निर्माणका क्रममा देखिने प्राविधिक तथा अन्य समस्या समाधानका लागि मन्त्रालयले आवश्यक समन्वय र सहजीकरण गर्ने बताउनुभएको छ। वीरेन्द्रनगर नगरपालिका–७ मा निर्माणाधीन एकीकृत प्रशासनिक भवनको स्थलगत निरीक्षण गर्दै मन्त्री रोकाले आधुनिक प्रविधिको प्रयोग गरी गुणस्तरीय निर्माणमा ध्यान दिन र जिम्मेवारीपूर्वक काम गर्न सम्बन्धित पक्षलाई निर्देशन दिनुभयो । भवन निर्माण सम्पन्न भएपछि प्रदेशका मन्त्रालयको प्रशासनिक काम एउटै परिसरबाट सञ्चालन गर्न सहज हुने उहाँको भनाइ थियो ।
त्यस्तै, प्रदेश सचिव अर्जुनकुमार बमले चुनौतीबीच अवसर खोजेर अघि बढ्नुपर्ने बताउँदै प्रत्येक महिना आयोजनाको प्रगति समीक्षा गर्न र देखिएका समस्या तत्काल समाधान गर्नुपर्नेमा जोड दिनुभयो । उहाँले सरिया, सिमेन्टलगायत निर्माण सामग्रीको प्रयोगशालाबाट गुणस्तर परीक्षण गर्न तथा निर्माण कार्यमा कुनै सम्झौता नगर्न निर्माण कम्पनीलाई निर्देशन दिनुभयो ।
३६ महिनामा निर्माण सप्पन्न गर्ने गरी करिब ३ अर्ब २ करोड २९ लाख ५८ हजार २८० रुपैयाँ लागतमा उक्त भवनको ठेक्का कन्टेक–नव सिर्जनशील जेभीले पाएको छ । सम्झौता भएसँगै निर्माण कम्पनीले काम समेत सुरु गरिसकेको छ । निर्माण कम्पनीले निर्धारित समयमै काम सम्पन्न गर्ने गरी काम गरिरहेको जनाएको छ ।
