रुकुम पश्चिमको मुसिकोट नगरपालिका वडा नम्बर १ खलंगामा आयोजित सातौँ सिद्ध गुफा गोल्ड कपको उपाधि युनिक व्याइज एफ.सी. मुसिकोटले जितेको छ । सल्ले यूथ क्लबद्वारा आयोजित प्रतियोगिताको आइतबार भएको फाइनलमा आठबिसकोट एफ.सी.लाई ५–० ले पराजित गर्दै युनिक व्याइजले उपाधि जितेको हो ।
विजेता युनिक ब्वाइजले नगद २ लाख २२ हजार २ सय २२ रुपैयाँ सहित ट्रफि जितेको छ । खेलाडीहरूले मेडल र प्रमाण पत्र समेत पाएका छन् । उप विजेता बनेको आठबिसकोट एफ.सी.ले नगद १ लाख ११ हजार १ सय ११ रुपैयाँ प्राप्त गरेको छ । त्यस्तै खेलाडीले मेडल र प्रमाण पत्र समेत प्राप्त गरेको आयोजक सल्ले यूथ क्लबले जनाएको छ ।
प्रतियोगितामा रुकुम पश्चिमका २४ वटा टिमले प्रतिस्पर्धा गरेका थिए । प्रतियोगिता सेभेन ए साइडमा खेलाइएको थियो भने एउटा टिमले जिल्ला बाहिरका २ जना खेलाडी राख्ने पाउने व्यवस्था थियो । व्यक्तिगत इभेन्टमा पनि खेलाडीहरूलाई पुरस्कृत गरिएको आयोजक सल्ले यूथ क्लबका अध्यक्ष मोहन खड्काले जानकारी दिनुभयो ।
युनिक ब्वाइज एफ.सी.मुसिकोटका भुवन नेपाली सर्वोत्कृष्ट खेलाडी घोषित भएका छन् । उनले आफ्नो टोलीलाई च्याम्पियन बनाउन महत्त्वपूर्ण भूमिका निर्वाह गरेका थिए । उनले ट्रफि प्राप्त गरेका छन् । त्यस्तै युनिक व्याइजका प्रतीक सुनार वेस्ट गोलकिपर, आठबिसकोट एफ.सी.का भिक्टर शाही वेस्ट डिफेन्ड बन्दा युनिक ब्याइजका विकास विस्ट टप स्कोरर बने । उनीहरुले पनि ट्रफि पाएका छन् ।
रातामाटा एफ.सी. र राउखेत एफ.सी. मुसिकोट २ ले फेयर प्ले अवार्ड पाएको आयोजक सल्ले यूथ क्लबले जनाएको छ । फाइनल खेल पश्चात् पुरस्कार वितरण कार्यक्रम सञ्चालन गरिएको थियो । प्रतियोगिता सञ्चालनका लागि सहयोग गर्ने सहयोगी तथा जिल्लाको फुटबल विकासका लागि सहयोग गर्ने सहित विभिन्न क्षेत्रमा योगदान पुर्याएका व्यक्तिहरूलाई सम्मान समेत गरिएको थियो ।
जिल्लाको फुटबल विकासमा टेवा पुर्याउने उद्देश्यले सल्ले यूथ क्लबले विगत सात वर्ष देखि सिद्ध गुफा गोल्ड कप आयोजना गर्दै आएको छ ।
