रुकुम पश्चिममा माओवादी केन्द्र एक्लैले जिल्ला समन्वय समिति बनाउँदै छ । जिल्ला समन्वय समितिको निर्वाचनमा पालिका प्रमुख, अध्यक्ष, उप प्रमुख र उपाध्यक्षले मतदान गर्न पाउँछन् । भने एक जना मतदाता बराबर २० मतभार हुन्छ । जिल्लाभरमा १२ जना मतदाता रहेकामा ९ जना नेकपा माओवादी केन्द्रबाट निर्वाचित भएका छन् । जिल्लामा तीन नगरपालिका र तीन गाउँपालिका मध्ये ४ पालिका प्रमुख, अध्यक्ष, उपप्रमुख र उपाध्यक्षमा माओवादी केन्द्रका उम्मेदवारले जीत हाँसिल गरेका छन् ।
चौरजहारी नगरपालिकाको प्रमुखमा पुष्प वादी, उपप्रमुखमा इश्वरीकुमारी शर्मा विएम, आठबीसकोट नगरपालिकाको प्रमुखमा रवि केसी, उपप्रमुखमा धनकुमारी शाही, सानीभेरी गाउँपालिका अध्यक्षमा विर्खबहादुर विष्ट, उपाध्यक्षमा कमला रोका पुन तथा त्रिवेणी गाउँपालिकाको अध्यक्षमा गणेशकुमार केसी र उपाध्यक्षमा राजकुमारी रेउले निर्वाचित भएकी छन् । एउटा पालिकामा भने माओवादीले उपाध्यक्ष जितेको छ । बाँििफकोट गाउँपालिकाको अध्यक्षमा कांग्रेस विजयी हुँदा उपाध्यक्षमा माओवादी केन्द्रका तर्फबाट तारा बुढा केसी निर्वाचित भएकी हुन् ।
जिल्ला समन्वय समितिको निर्वाचनका लागि नेपाली कांग्रेसका २ जना मात्र प्रतिनिधि छन् । मुसीकोट नगरपालिकाको प्रमुख र बाँफिकोट गाउँपालिकाको अध्यक्षमा कांग्रेसले जितेको छ । मुसीकोटको प्रमुखमा महेन्द्र केसी र बाँफिकोटको अध्यक्षमा जनककुमार बाँठा निर्वाचित भएका हुन् । जिल्ला समन्वय समितिको निर्वाचनका लागि नेकपा एकीकृत समाजवादीबाट पनि मतदाता छन् । एकीकृत समाजवादीका तर्फबाट मुसीकोट नगरपालिकाको उपप्रमुखमा विमलकुमार पुन निर्वाचित भएका छन् । जिल्लामा जिसस निर्वाचनको मिति तोकिएको छैन् । कार्यपालिका निर्वाचन सकिएपछि जिससको निर्वाचन मिति तोकिने मुख्य निर्वाचन अधिकृतको कार्यालयले जनाएको छ ।
वहमुत भएका कारण जिससको नेतृत्व माओवादीले नै गर्ने निश्चित छ । प्रमुख, उपप्रमुख र सबै सदस्यमा माओवादीबाटै निर्वाचित हुने निश्चित छ । माओवादीले यसअघि नै प्रमुख पद महिलालाई दिने निर्णय नै गरेको छ । तर नेकपा माओवादी केन्द्र भने कसलाई प्रमुख, उपप्रमुख वा सदस्य बनाउने भन्ने विषयमा कुनै छलफल नभएको बताउँछ । जिल्ला संयोजक गोविन्द रोका सचिनले जिससका सम्बन्धनमा पार्टीमा ठोस छलफल र कुनै निर्णय नभएको बताउनुभयो ।
निर्वाचनको मिति तोकियो भने यसबारेमा औपचारिक छलफल सुरु हुने उहाँले बताउनुभयो । कांग्रेसले भने पार्टी अल्पमतमा रहेकोले यसबारेमा केही नसोचिएको बताएको छ । तर सहमति गरेर जाने सन्दर्भमा भने छलफलका लागि तयार रहेको पार्टी सभापति प्रेमप्रकाश ओलीले बताउनुभयो । जिसस ९ सदस्यीय रहने व्यवस्था छ ।
