रुकुम पश्चिममा अवैध रूपमा नदीजन्य पदार्थ बालुवा उत्खनन तथा ओसारपसारमा संलग्न ६ वटा सवारीसाधन प्रहरीले नियन्त्रणमा लिएको छ ।
जिल्ला प्रहरी कार्यालय रुकुम पश्चिमका अनुसार मुसिकोट नगरपालिका–२ लामितालस्थित सानीभेरी नदीबाट अवैध रूपमा बालुवा उत्खनन भइरहेको भन्ने गोप्य सूचनाका आधारमा प्रहरीले सवारीसाधन नियन्त्रणमा लिएको हो ।
असोज १५ गते राति करिब १० बजे अस्थायी प्रहरी पोस्ट छिनखेतबाट खटिएको प्रहरी टोलीले अवैध रूपमा बालुवा उत्खनन गरी ओसारपसार गरिरहेको अवस्थामा सवारीसाधन फेला पारेको थियो ।
नियन्त्रणमा लिइएका सवारीसाधनमा एक थान जेसीबी, चार थान टिप्पर र एक थान ट्र्याक्टर रहेका छन् । प्रहरीले ती सवारीसाधन आवश्यक कारबाहीका लागि मुसिकोट नगरपालिकाको कार्यालयमा पठाउने प्रक्रिया अघि बढाएको जनाएको छ ।
अवैध रूपमा नदीजन्य पदार्थ उत्खनन तथा ओसारपसार नियन्त्रण गर्ने उद्देश्यले प्रहरीले निगरानी र कारबाहीलाई निरन्तरता दिइरहेको जिल्ला प्रहरी कार्यालयले जनाएको छ ।
