रुकुम पश्चिमको बाँफिकोट गाउँपालिका र सानीभेरी गाउँपालिकाको भेरी पारिको भूगोल सडक सञ्जालमा जोडिएको छ । नजिकै भएपनि भौगोलिक विकटताका कारण लामो समयसम्म सडक सञ्जालमा जोडिन नसकेको २ गाउँपालिकाको भेरी पारि पट्टीको भूगोल पहिलो पटक सडक सञ्जालमा जोडिएको हो ।
बाँफिकोट गाउँपालिकाको वडा नम्बर १० को गाराघाट र सानीभेरी गाउँपालिकाका वडा नम्बर ३ गरायलादेखि भेरी पारि पट्टीका विभिन्न ठाउँ सडक सञ्जालमा जोडिएका हुन् । आर्थिक वर्ष २०६७÷०६८ बाटै सडक नै भेरी पारिलाई सडक सञ्जालमा जोड्ने प्रयास भएको थियो । सानीभेरी तिरबाट पहिला नै सुरु भएपनि बाँफिकोट तिरबाट भने स्थानीय तह बनेपछि सडक निर्माणको काम सुरु भएको थियो ।
तर भौगोलिक विकटताका कारण लामो समयसम्म पनि सडक सञ्जालमा जोड्न सम्भव भएको थिएन । आर्थिक वर्ष वर्ष २०७४÷०७५ देखि कामले थप गति लिएकामा चालु आर्थिक वर्षमा आएर सानीभेरी गाउँपालिकाको वडा नम्बर ३ र बाँफिकोट गाउँपालिकाको वडा नम्बर १० सडक सञ्जालमा जोडिएको हो । ठूलो प्रयासपछि भेरी पारिलाई सडक सञ्जालमा जोड्न सकिएको बाँफिकोट गाउँपालिका वडा नम्बर १० का वडाध्यक्ष हरि चन्दले बताउनुभयो ।
बाँफिकोट गाउँपालिका तर्फ वडा नम्बर १० को गाराघाटबाट सुरु भई सानीभेरी गाउँपालिकाको सिमाना मैदुलोटेसम्म करिब ७ किलोमिटर सडकको ट्रयाक खोलिएको छ । उक्त सडक निर्माणका लागि हालसम्म १ करोड ८५ लाख बजेट खर्च भएको वडाध्यक्ष चन्दले बताउनुभयो । उहाँका अनुसार केही ठाउँमा काम चलिरहेको छ ।
त्यस्तै सानीभेरी गाउँपालिकाको वडा नम्बर ३ को पेदीबजार हुँदै मैदुलोटेसम्म करिब ९ किलोमिटर सडक निर्माण भएको छ । उक्त सडक निर्माणका लागि डेड करोड बढी बजेट खर्च लागेको गाउँपालिका अध्यक्ष विर्खबहादुर बिष्टले बताउनुभयो । तर सडक मर्मत भने हुन नसकेको उहाँको भनाई छ ।
भेरीपारी सडक सञ्जालमा जोडिएसंगै बाँफिकोट र सानीभेरीका विभिन्न ठाउँमा पहिलो पटक ट्याक्टर, मोटरसाइकल लगायतका सवारी साधनहरु पुगेका छन् । नियमित सवारी साधन संचालनका लागि केही ठाउँमा मर्मतको काम गर्नुपर्ने र त्यसका लागि बजेटको समेत व्यवस्था भइसकेको बाँफिकोट १० का वडाध्यक्ष चन्दले बताउनुभयो ।
नजिकै भएर पनि विकट ठाउँका रुपमा रहेका वस्तीहरु सडक सञ्जालमा जोडिएको र अव त्यसको सुधार तथा थप वस्तीहरुमा विस्तारका लागि प्रयास भइरहेको उहाँको भनाई छ । उहाँका अनुसार एकता आधारभूत विद्यालय सेजे देखि बालहित आधारभूत विद्यालयसम्मको ४ किलोमिटर सडक निर्माणका लागि ५० लाख बजेट आएको छ ।
त्यस्तै मयारी देखि भानुभक्त मावि सम्मको डेढ किलोमिटर सडक निर्माणका लागि ३० लाख बजेट आएको छ । मुख्य रुपमा वडा सडक सञ्जालमा जोडिएपछि अव वस्ती वस्ती जोड्ने सडकहरु प्राथमिकतामा रहेको वडाध्यक्ष चन्दले बताउनुभयो ।
