रुकुम पश्चिमको बाँफिकोट गाउँपालिकाका १ सय ४ जना बालबालिकालाई १ वर्षलाई पुग्ने शैक्षिक सामग्री वितरण गरिएको छ । गाउँपालिका भरीका विपन्न, जेहेन्दार, टुहुरा, संरक्षण विहिन, सहिद परिवारका बालबालिकाका लागि भन्दै स्थापना गरिएको आमा बाबु स्मृति प्रतिष्ठान छात्रवृत्ति अक्षयकोषबाट आज उक्त बालबालिकाहरुलाई शैक्षिक सामग्री वितरण गरिएको हो ।
यो कोषबाट वर्षेनी गाउँपालिका भरीका विद्यालयमा अध्यनरत कार्यविधिले तोके अनुसारका बालबालिकाहरुलाई वर्षभरीलाई पुग्ने शैक्षिक सामग्री वितरण गर्ने गरिएको छ । चालु शैक्षिक सत्रका लागि १४ जना जेहेन्दार, ३२ जना टुहुरा, १२ जना सहिद परिवार र ४६ जना विपन्न बालबालिकालाई शैक्षिक सामग्री वितरण गरिएको अक्षय कोष संचालक समितिका अध्यक्ष चन्द्रबहादुर केसीले बताउनुभयो ।
कापि, कलम, झोला, टिफिन बक्स, पोषक लगायतका १ वर्षलाई पुग्ने शैक्षिक सामग्री वितरण गरिएको उहाँले बताउनुभयो । वडा नम्बर ४ को विरेन्द्र माविमा आज एक कार्यक्रमको आयोजना गरी गाउँपालिकाका ३० वटा विद्यालयबाट छनौट भएका बालबालिकाहरुलाई शैक्षिक सामग्री वितरण गरिएको हो । यो वर्ष कोषको साँवाबाट संकलन भएको ब्याज ३ लाख ५० हजार मुल्य बराबरका सामग्री वितरण गरिएको अध्यक्ष केसीले बताउनुभयो ।
देश तथा विदेशमा रहेका व्यक्तिहरुले आफ्ना आमा, बुवाको सम्झनामा सहयोग गरेको रकमबाट हालसम्म कुल ३३ लाख ४ हजार १५ बराबरको अक्षय कोष रहेको छ । यो कोष दिन प्रतिदिन बढ्दै गइरहेको छ । कोष संचालक समितिका अनुसार विभिन्न व्यक्तिहरुले स्वैच्छिक रुपमा कोषमा रकम जम्मा गरिरहेका छन् । आमा बुवाको सम्झनामा दिन प्रतिदिन कोषको रकम थपिदैं गएको छ ।
२०७८ सालदेखि कोषबाट छात्रवृत्ति वितरण सुरु गरिएको समितिले जनाएको छ । छात्रवृत्ति वितरण गरिएको यो तेस्रो पटक हो । अक्षयकोष संचालक समितिका अध्यक्ष चन्द्रबहादुर केसीको अध्यक्षतामा भएको छात्रवृत्ति वितरण कार्यक्रममा बाँफिकोट गाउँपालिका शिक्षा, युवा तथा खेलकुद शाखा प्रमुख रत्नबहादुर केसीको प्रमुख आतिथ्यता रहेको थियो ।
