रुकुम उद्योग वाणिज्य संघको १४ औं साधारण सभा तथा १२ औं अधिवेशन सम्पन्न भएको छ । शुक्रबारबाट मुसिकोटमा सुरु भएको साधारण सभा तथा अधिवेशन १५ सदस्य निर्विरोध निर्वाचित गर्दै आज सकिएको हो । प्रत्यक्ष निर्वाचन प्रणालीबाट १८ जना सदस्य निर्वाचित हुने व्यवस्था भएपनि भूगोलबाट ३ जनाको कम उम्मेदवारी परेपछि १५ सदस्य मात्र निर्वाचित भएको निर्वाचन अधिकृत गणेश हमालले बताउनुभयो ।
अव पहिलो बैठकबाट पदाधिकारी चयन हुने उहाँले बताउनुभयो । विधान अनुसार पहिलो चरणको निर्वाचन प्रक्रिया सकिएको र अव दोस्रो चरणको निर्वाचनबाट नेतृत्व चयन हुने उहाँको भनाई छ । आज निर्वाचित सदस्यहरुबाट पदाधिकारी चयन गरिने छ । निर्वाचित हुने सदस्यहरुमा पलबहादुर खड्का, दलबहादुर खड्का, रविन्द्रकुमार बिष्ट, टंकलाल सन्यासी, अनिल बुढा र रमेश खड्का रहनुभएको छ ।
त्यस्तै रुपलाल बिष्ट, गोकर्ण मल्ल, कस्तुप नेपाली, तेजबहादुर बटाला, डम्बर केसी, नवराज बाँठा, धनबहादुर ओली, झगबिर सुनार र दयाराम खत्री पनि सदस्यमा निर्विरोध निर्वाचित हुनुभएको छ । पदाधिकारी चयन र बाँकी सदस्य मनोनयनका लागि पहिलो बैठक सोमबार बोलाइएको नव निर्वाचित सदस्य दलबहादुर खड्काले बताउनुभयो ।
उक्त बैठकले अध्यक्ष, १ जना बरिष्ठ उपाध्यक्ष, २ जना उपाध्यक्ष, १ जना महासचिव, १ जना सचिव र १ जना कोषाध्यक्ष चयन गर्ने खड्काले बताउनुभयो । त्यस्तै बाँकी सदस्य पनि मनोनित हुने छन् । यो संगै उद्योग वाणिज्य संघले लामो समयपछि निकास पाएको छ । आर्थिक अनियमिता भएको भन्दै लामो समय देखि उद्योग वाणिज्य संघ अन्यौलताको भूमरीमा फसेको थियो ।
यसको निकासका लागि पलबहादुर खड्काको संयोजकत्वमा कार्यसंचालन समिति बनाइएको थियो । उक्त समितिलाई तत्कालका लागि कार्यसंचालन गर्न र देखिएका समस्यालाई हल गरी ६ महिनाभित्र निर्वाचन गरेर नयाँ नेतृत्व चयन गर्ने कार्यादेश दिइएको थियो । तर उक्त समिति बनेको ३ वर्षपछि मात्र नयाँ नेतृत्व आउन लागेको छ ।
उद्योग वाणिज्य संघ रुकुम पश्चिम ८ वर्ष देखि नेतृत्व विहिन अवस्थामा थियो । २०७२ साल देखि नेतृत्व पाउन सकेको थिएन् । पटक पटक प्रयास गर्दा पनि नेतृत्व चयन हुन सकेको थिएन् । उद्योग वाणिज्य संघमा ठूलो आर्थिक हिनामिना भएको आरोप लाग्दै आएको छ । तर हालसम्म त्यसको कुनै कानुनि उपचार भने हुन सकेको छैन् । अव नयाँ नेतृत्वले त्यसलाई कसरी लिन्छ भन्ने चासो विषय बनेको छ ।
