भोलि सोमबार जेठ १५ गतेका दिन हुन गइरहेको १६ औँ गणतन्त्र दिवसको अवसर पारी रुकुमपूर्वमा आज आइतबार बजार सरसफाई गरिएको छ । जिल्ला समन्वय समिति रुकुम पूर्वको आयोजनामा आइतबार बिहान सिस्ने गाउँपालिका-६ रुकुमकोट स्थित छिप्रिदह बजार क्षेत्रमा सरसफाई गरिएको हो ।
कैँचीमोड देखि सुरु गरिएको सरसफाई छिप्रिदह बजार हुँदै सोही वडाको लुस्पाधारा सम्म सरसफाई गरिएको निमित्त समन्वय अधिकारी रविन्द्र बुढाक्षेत्रीले बताउनुभयो । शुक्रबार जिल्ला प्रशासन कार्यालयमा बसिएको गणतन्त्र दिवस जिल्ला समारोह समितिको बैठकले गरेको निणर्य अनुसार आज बजार सरसफाई गरिएको बुढाक्षेत्रीले जानकारी । जिसस उपप्रमुख मोहनबहादुर केसीको संयोजकत्वमा बजार सरसफाई गरिएको छ ।
सरसफाई कार्यक्रममा जनप्रतिनिधि, जिल्ला स्थित सरकारी तथा गैरसरकारी कार्यालयका कर्मचारी, सुरक्षाकर्मी, स्थानीय व्यापारी लगायत गरी करिब दुई सय जनाको उपस्थिति रहेको थियो । ‘अहिले विभिन्न सरुवा रोग फोहोरका कारण सर्ने र रोगको संक्रमण हुने समय सुरु हुन थालेको छ । यसलाई मध्यनजर गरेर गणतन्त्र दिवसको अवसर पारी हामीले सिर्जनशिल कार्यक्रम गरेर मनाएका हौं’, बुढाक्षेत्रीले भन्नुभयो, ‘आगामी दिनमा यस्ता कार्यक्रमलाई थप विस्तार गर्दै लगिनेछ ।’
दिवसको अवसरमा जिल्ला स्थित सरोकारवाला निकायले बजार क्षेत्र र घर आँगन नियमित सरसफाई गर्नु पर्छ भन्ने बानीको अभ्यास होस् भनी सरसफाईको कार्यक्रम आयोजना गरिएको आयोजकले जनाएको छ । ‘एक दिन सरोकारवाला निकायले सरसफाई गरेर पुग्दैन’ बुढाक्षेत्रीले भन्नुभयो -‘सरसफाई स्वयम व्यापार व्यवसाय एवम् घरधनीले गर्नु पर्छ । यद्यपी फोहोर व्यवस्थापन भने सरकारले गर्नु पर्ने हुन्छ ।’ भोलि सोमबार गणतन्त्र दिवसका दिन रुकुमकोटमा गणतन्त्र दिवस जिल्ला समारोह समितिले बजार परिक्रमा सहित कोणसभा गरी १६ औँ गणतन्त्र दिवस मनाउने तयारी गरेको छ ।
सरसफाई कार्यक्रममा जिसस उपप्रमुख मोहनबहादुर केसी, सिस्ने गाउँपालिकाका अध्यक्ष कृष्ण रेग्मी, प्रमुख जिल्ला अधिकारी माधवप्रसाद शर्मा, निमित्त समन्वय अधिकारी रविन्द्र बुढाक्षेत्री, सहायक प्रमुख जिल्ला अधिकारी हिरालाल आचार्य लगायत सुरक्षा निकायका प्रमुख तथा प्रतिनिधि, जिल्ला स्थित विभिन्न सरकारी तथा गैरसरकारी कार्यालयका प्रमुख एवम् प्रतिनिधि, स्थानीय व्यापार व्यवसायको सहभागीता रहेको थियो ।
1696245848.jpg)
