आगामी फागुन २१ गतेका लागि तोकिएको प्रतिनिधि सभा सदस्य निर्वाचनको सुरक्षार्थ रुकुम पश्चिममा भोली देखि निर्वाचन प्रहरीका लागि छनौट भोली माघ ५ गते देखि सुरु हुने भएको छ । जिल्ला प्रशासन कार्यालयले आज एक सूचना जारी गर्दै भोलीबाट छनोट सुरु हुने जानकारी दिएको छ । कार्यालयका अनुसार भोली र पर्सी दरखास्त दिएका उम्मेदवारहरूको प्रारम्भिक शारीरिक परीक्षण तथा शारीरिक सहिष्णुता परीक्षा हुने छ ।

भोली पहिलो सिफ्टमा बिहान ७ बजे देखि ११ बजेसम्म दर्ता नम्बर १ देखि ६ सय ९९ र दोस्रो सिफ्ट दिउँसो १ बजे देखि बेलुकी ५ बजेसम्म दर्ता नम्बर ७ सय १ देखि १३ सय ९९ सम्मका उम्मेदवारको परीक्षा सञ्चालन हुने सहायक प्रमुख जिल्ला अधिकारी केशवप्रसाद ओलीले जानकारी दिनुभयो ।

त्यस्तै पर्सी ६ गते पहिलो सिफ्टमा दर्ता नम्बर १४ सय १ देखि २ हजार ९९ र दोस्रो सिफ्टमा २१ सय १ देखि २६ सय ३ तथा सशस्त्र प्रहरी बल ४७ नम्बर गुल्ममा आवेदन दिएका सम्पूर्णका लागि परीक्षा हुने उहाँले बताउनुभयो । उक्त परीक्षामा वेयरिङ चेकजाँच, सामान्य स्वास्थ्य परीक्षण, सिट अप, पुस अप र दौड सञ्चालन हुने छन् ।

उक्त परीक्षामा सहभागी हुँदा प्रवेश पत्र साथमा हुनुपर्ने छ भने गेम ड्रेस/ट्रयाक सुट, स्पोर्ट सुज लगाएर आउनुपर्ने जिल्ला प्रशासन कार्यालयले जारी गरेको सूचनामा उल्लेख गरिएको छ । जिल्लामा ९ सय ४९ जना निर्वाचन प्रहरीका लागि भर्ना खुलेको थियो । पुस २५ गते देखि माघ १ गतेसम्मको निर्धारित समयमा १४ सय १४ जनाले आवेदन दिएको बताइएको छ ।

जसमा १३ सय १ जनाले जिल्ला प्रहरी कार्यालय र १ सय १३ जनाले सशस्त्र प्रहरीमा आवेदन दिएका हुन् । सबै १४ सय १४ जनाको संयुक्त छनोट हुने छ भने कोटा अनुसार छनोट भएकाहरू मध्ये प्रहरीले ८ सय ५३ जना र सशस्त्रले ९६ जना निर्वाचन प्रहरी परिचालन गर्ने छ ।