मुसिकोट खलङ्गा खानेपानी तथा सरसफाइ उपभोक्ता संस्थाले तीन महिना भाका नाघेको खानेपानीको महसुल तुरुन्त बुझाउन उपभोक्ताहरूलाई अनुरोध गरेको छ । एक सूचना जारी गर्दै संस्थाले तीन महिना भाका नाघेको महसुल तत्काल बुझाउन भनेको हो । 

संस्थाले भाद्र १६ गते सूचना जारी गर्दै सात दिन भित्र तीन महिना भाका नाघेको खानेपानी महसुल बुझाउन भनेको छ । नत्र धारा काट्ने संस्थाले चेतावनी दिएको छ । 

सूचना जारी भएको ७ दिन भित्र अनिवार्य रूपमा खानेपानीको महसुल बुझाई सहयोग गरिदिनुहुन अनुरोध छ । नत्र संस्थाको नियमानुसार धाराको लाइन बन्द गरिने ब्यहोरा जानकारी गराइन्छ, सूचनामा भनिएको छ । 

संस्थाले मुसिकोट नगरपालिकाको खलङ्गा बजार सहित विभिन्न वडामा खानेपानी वितरण गर्दै आइरहेको छ । व्यक्तिगत र संस्थागत गरी संस्थाका ११ सय ५२ उपभोक्ताहरू रहेको संस्थाका अध्यक्ष महेन्द्रराज गौतमले जानकारी दिनुभयो । 

ठुलो बक्यौता उठ्न बाँकी रहेकाले महसुल बुझाउन उपभोक्ताहरूलाई आग्रह गरिएको उहाँले बताउनुभयो । संस्था सञ्चालन तथा नियमित खानेपानीका लागि महसुल उठ्न जरुरी भए पनि धेरै उपभोक्ताहरूबाट लामो समयको महसुल उठ्न बाँकी रहेको उहाँको भनाई छ ।