पीर गीतको बारे धरै चर्चा परिचर्चाहरु भए । ठुला बिश्लेषक, पत्रकार, राजनीतिकर्मी र कलाकर्मी लगायतले आफ्ना विचार पोखे । भने मुलधारका मिडीयाहरुले प्राथमिकताका साथ ति विचार र लेखहरुलाई ठाउँ दिए । सम्भवत त्यै चर्चाकै कारण उक्त गीतले हप्ता दिनमै एक करोड भ्युज पनि पाउँन सफल भयो जुन आज सम्मकै नेपाली म्युजिक भिडीयो ईतिहाँसको नयाँ रेकर्ड भनेर भनिएको छ । यसरी पीर गीतको विभिन्न कोणहरुबाट समर्थन र बिरोध अनि चर्चा भईरहँदा यस गीतका सर्जक प्रकाश सपुत यो माहौलबाट अछुत हुने त कुरै भएन । शुरुमा आफुले यथार्थ कुराको बिम्बलाई मात्र उतारेको भन्दै बरु हेर्ने र बुझ्ने श्रोताहरुको बुझाई अलि फराकिलो पार्नुपर्ने प्रतिक्रिया दिएका थिए । जुन प्रतिक्रियाले भिडीयो भित्रको अपमानित दृश्यको बिरोध गरीरहेका ठुलो पङ्तिको चेतनामाथी नै सिधा काउन्टर दिएको बुझ्न सकिन्थ्यो । अर्थात हटाउँन आवश्यक छैन बरु तपाईहरुको बुझाई हटाउँनुस् फेर्नुस् भन्ने प्रकाशको प्रतिक्रियाको भाव थियो । तर हप्तादिनपछि आएर उनले एकाएक उक्त विवादित दृश्य हटाएको घोषणा गरे र सम्पादित नयाँ भिडीयो अप्लोड गरे ।

अघिल्लो भिडीयो हटाएर सम्पादित नयाँ भिडीयो अप्लोड गरीसकेपछी हिजो बिरोध गर्ने अधिकांश कम्रेडहरुले प्रकाशले आफुहरुको दबाबको कारण भिडीयो हटाएको र आफुहरुको जीत भएको दाबि गरे । केही हद सम्म यो सत्य पनि हुन सक्छ तर सारमा बुझ्ने हो भने कम्रेडहरुको जीत होईन बरु पटक पटक चतुर प्रकाशले जीतिरहेको म देखिरहेछु । प्रकाशले पटक पटक जनयुद्ध र माओबादी विचारधाराका मानिसहरुको जीबन कथा र भावनालाई डलर झार्ने खेलोको रुपमा प्रयोग गर्न सफल भएका छन् । यसकारण यो कम्रेडहरुको जीत नभई प्रकाश सपुतको व्यापारीक जीत हो । यदि कम्रेडहरुको बिरोध र दबाबलाई सम्मान गर्ने निस्वार्थ क्षमता प्रकाशमा हुन्थ्यो भने एकदुईदिन भित्रै भिडियो सम्पादन गरी रिअप्लोड किन गर्न नसकेका ? जतिबेला बिरोधको ओईरो थियो ।

देश लुट्नेहरुको नाममा पशुपति शर्माले लुट्न सके लुट भन्ने गीति ल्याउँदा एमाले पङ्तिले त्यो देश लुटुवाहरु आफुहरु रहेको प्रमाणित गर्दै धाराप्रवाह चेतावनी दिँदा उतिखेरै तुरुन्त भिडीयो हटाएका हैनन् ? तर प्रकाश सपुतले किन उतिखेरै तुरुन्त हटाएनन् ?  किन बिरोध गर्ने माओबादी समर्थकहरु करीब करीब सेलाउँदै गएको समयमा आएर भिडीयो हटाए ?  यसको कारण सजिलो छ पशुपति शर्मा भन्दा प्रकाश सपुत एक चतुर संगीत ब्यापारी हुन् । उनले कस्लाई कसरी टच गर्दा डलर बर्षिन्छ भन्ने कुरा राम्ररी बुझेका छन् ।

मेरो बुझाईमा उनलाई राम्ररी थाहा थियो कि माओबादी पृष्ठभूमिका पिडीत तप्काहरुको पिडालाई साधारण र स्वभाविक दृश्य मार्फत मात्रै देखाउँदा संगीत ब्यापार फस्टाउँनेवाला छैन । किन की बाठो प्रकाशलाई थाहा छ यो देशमा यस्ता दुखका कयौँ गीति भिडीयोहरु बने । तर ति गीति भिडीयो बनाउँने थुप्रै सर्जकहरु आज पर्यन्त फाटेको जुत्ता र चप्पल लगाएर शहरका गल्लिहरुमा भौतारीरहेका छन् । उपचार खर्च समेत जुटाउँने आर्थिक हैसियत उनिहरुको छैन । त्यसबाट सचेत रहेका प्रकाशले नियोजीत रुपमै नेपालको राजनीतिक वृत्त चित्रमा झटारो लाग्ने गरी केही सेकेण्डको भएपनि अस्वभाविक र उत्तेजित दृश्यले हिर्काईदिएका हुन् । यसो गर्दा एउटा तप्का उत्तेजित भएर आउँने छ भने अर्को तप्का ताली पिट्दै आउँने छ र अन्तत यिनिहरुको होडबाजी र होहल्लाले सर्जकलाई हजारौँ डलरको इनाम मिल्ने परीकल्पनामा प्रकाश सपुत ढुक्क थिए ।

एकजना युट्युब च्यानल चलाईरहेका साथीको अनुभव अनुसार मनिटाईज भईसकेको युट्युब च्यानलको कमाई भनेको १ हजार भ्युज बराबर कम्तिमा करिब २ डलर हो । ठ्याक्कै हिसाब त सम्बन्धित मानिसलाई थाहा हुने कुरा भईनै हाल्यो । तैपनि हप्ता दिनमा एक करोड भ्युज पाएपछी बल्ल भिडीयो हटाएका प्रकाशले २ डलरको दरमा पनि १ करोड भ्युजको मोटामोटी २० हजार डलर कमाई गरीसकेको बुझ्न सकिन्छ । त्यो भनेको नेपाली करीब २४ लाख रुपैया हो । उनले माओबादीका पीर बेचेर र भावनामा खेलेर हप्ता दिनमै कम्तिमा २४/२५ लाखको ब्यापार गरे । जब स्वार्थ पुरा गरे, तब अर्को स्वार्थको खातिर भिडीयो हटाएर माओबादीको बिरोध र भावनालाई पनि कदर गरेको जस्तो देखाए । तर कम्रेडहरु आफुले जीतेको फिलिङ्समा बगीरहेका छन । वास्तवमा कम्रेडहरुको जीत होईन चतुर प्रकाशको जीत हो । प्रकाशले एक धनुषबाट दुईवटा तीर प्रहार गरेका छन् । पहिले कस्तो खालको आपत्तिजनक रहेछ त ?  भनेर सबैले हेरेका थिए । भने अब फेरी के के हटाएको रहेछ त ? भनेर सबैले हेर्ने भए । यसले प्रष्ट पार्छ कि पशुपति शर्मा एक जेन्टल गायक हुन् भने प्रकाश सपुत एक चतुर संगीत ब्यापारी ! यद्धपी उनले नियोजित - सुनियोजित, स्वार्थ - निस्वार्थ जे सुकै नियतले हटाए पनि त्यो विवादित भनिएको दृश्य हटाउँनु राम्रो पक्ष हो ।

अब पशुपति शर्मा र प्रकाश सपुतको गीति भिडीयोहरुको भिन्नता बारे थोरै छफलफल गरौँ । शाब्दिक रचनाको हिसाबले 'लुट्न सके लुट' र 'पीर' यि दुबै सृजनाको मुक्तकण्ठले सम्मान गर्नु पर्छ भन्ने मेरो मान्यता हो । किन की लुट्न सके लुट ले करोडौँ अरबौँको हिसाबमा देश लुट्ने दलालहरु र भ्रष्टाचारीहरुको कर्तुतलाई उजागर गर्ने काम गरेको थियो भने पीरले देश परीवर्तनको लागी बर्षौँ सम्म सर्वोश्व त्यागेर हिडेका वीरहरुले आज पाईरहेको पीरको उजागर गरेको छ । भलै माओबादी नेता भईसकेका र केही स्थापित भई सुकिला मुखिला भई हिडेकाहरुलाई यो नपच्न सक्छ । तर पीरले उजागर गरेको पीर (भाव) सत्य नै हो यो स्विकार्नु पर्छ र त्यसको विकल्पहरु खोजिनु पर्छ । तर लुट्न सके लुटले शब्द संगीत अनुसारकै स्वभाविक भिडीयो दृश्य कैद गरेको थियो भने पीरले शब्द संगीत भन्दा पर पुगेर अस्वभाविक दुश्य कैद गर्यो । महिला र पुरुष दुबै पुर्व जनमुक्तिसेनाहरुको आत्मसम्मानमा चोट पुर्याउँने शन्देस प्रवाह गर्यो । उनिहरु मध्य पुरुष जनमुक्तिसेनाहरु पीर बिसाउँन यौनकर्मी महिलाहरुकोमा पुग्ने गरेको र महिला जनमुक्तिसेनाहरु पीर बिसाउन आउँनेहरुको बिसौना भई बाँचेको अर्थात शरीर बेचेर बाँचेको जस्ता अस्वभाविक र घटिया दृश्यहरु प्रदर्शित गरीयो ।

सोँच्दा पनि बडो हाँसो लाग्ने अनि रिष पनि उठ्ने कुरा के छ भने, अभावकै कारण श्रीमती विदेश हिडेर उतै वेपत्ता भएका बेला 'पीर बिसाउँने ठाउँ पाईनँ कता जाम के गरम्' भन्दै श्रीमान (भुपु लडाकु)ले यौन व्यापारी महिलाको कोठा चहार्दै हिडेको देखाईएको छ । म कन्फ्युज् भएको थिएँ प्रकाशले उजागर गर्न खोजेको पीर कस्तो खाले पीर हो ? भनेर ! देशको पीर, जिन्दगीको अभाव र अधिकारको पीर वा मनमुटुबाटै माया गरीने जीबनसाथीको विछोडको पीर हो भने पीर बिसाउँने भन्दै एक यौनकर्मीको डेरामा के खोज्न गएको ?  त्यसकारण प्रकाशले प्रकाश पार्न खोजेको पीर केवल यौनतृष्णाको पीर हो भनेर बुझ्न किन नपाउँने ?  हैन भने एक यौनव्यापारी महिलाको कोठामा पुगेर पाँच सय रुपैयामा बिसाईने पीर कुन चैँ पीर हुन्छ ? त्यो त अवश्यम्भावी सेक्स अभावकै पीर हैन र ? अनि यो खाले वाहियात दृश्यको बिरोध नभएर कस्को हुन्छ ? हो लुट्न सके लुट र पीरमा नमिलेको ठुलो भिन्नता यही हो ।

अन्तिममा पार्टीगत विचारको चस्मा लगाएर र पुर्वाग्रही चोँचमा बोल्नेहरुको बारे थोरै चर्चा ! कतिपयले भन्ने गरे कि यथार्थमै पनि यस्तो व्यवसायमा लागेका केही भुपु लडाकुहरु छन्, यो दृश्य स्वभाविक छ । हो केही लागेका हुन सक्छन् ! कोही पनि लागेकै छैनन् भनेर ठोकुवा दिन मिल्ने स्थिति छैन । तर एकाधहरुको कामलाई सिङ्गो पार्टी, सिङ्गो संगठन र मोर्चामाथी प्रहार हुने गरी प्रचार गर्ने छुट कसैलाई छ ?  त्यसो त हिजो पशुपति शर्माले देशको समग्र दलाल र भ्रष्टेहरुको यथार्थलाई उजागर गरेका हैनन् र ? उनले कुनै पार्टी बिशेषको वा संगठनको नाम कहाँ लिएका थिए त ?  तर चोरको खुट्टा काट भन्दा एमालेले पहिलै खुट्टा उचालेर चिच्याएको होईन ? अहिले प्रकाश सपुतले त सिधै माओबादी जनयुद्ध र जनमुक्ति सेनाहरुको तोकेरै धज्जी उदाएका थिए । महिला र पुरुष दुबैको मानहानि हुने गरी भिडीयो दृश्य देखाएका थिए । अनि त्यसको बिरोध गर्दा बेकार र अस्वभाविक हुने ?  यो कस्तो खालको बुझाई ?

के एमाले वा कांग्रेस संवद्ध कुनै महिला संगठन सदस्यहरु वा समर्थकहरु यौन धन्दामा लागेर बाँचिरहेको शन्देस् दिने भिडीयो आएको खण्डमा ति पार्टी र तिनका समर्थकहरु चुप लागेर बस्न सक्थे ? माओबादीको भन्दा चार गुणाबढि जात्रा देखाउँने वाला छौ यो पक्का हो । के तिम्रा पार्टी सदस्य लिएका वा समर्थक कोही पनि त्यस्तो कार्यमा छैनन् भनेर ठोकुवा दिन सक्छौ ? अनि यो पीरको दृश्य स्वभाविक छ स्वभाविक छ भन्दै हिड्न कसरी सकेको ? पशुपति शर्मा चैँ गलत, अकलाकार, अपराधी जस्तो ठहरीने तथानाम धम्की दिएर गीत बन्द गर्न लगाउँने ! अनि भुपु जनमुक्तिसेनाहरु पिर बिसाउँन यौनकर्मीहरुकोमा पुग्ने गरेका छन् र भुपु सेनानीहरु फेरी त्यो यौनकर्मी भएर बसेका छन् भन्ने शन्देस दिने जस्तो कथित गीति भिडीयो प्रदर्शन गर्ने प्रकाश सपुत चैँ महान सर्जक साबित हुने ? यसले के प्रष्ट पार्छ भने ति अनाहकमा ताली पिट्नेहरु सँग हरेक सवालमा राजनीतिक पुर्वाग्रही र प्रतिशोध भन्दा माथी उठेर वर्गबिशेष र मानवबिशेषको विचार दृष्टिले हेर्ने र चल्ने चेतना शुन्य स्तरको रहेछ भन्ने कुरा प्रष्ट पारीदिएको छ ।