आठबीसकोटका मेयर केसी पहिरोबाट क्षतिग्रस्त स्थानको अनुगमनमा

स्थानीय सरकार

Home
स्थानीय सरकार
आठबीसकोटका मेयर केसी पहिरोबाट क्षतिग्रस्त स्थानको अनुगमनमा

आठबीसकोटका मेयर केसी पहिरोबाट क्षतिग्रस्त स्थानको अनुगमनमा आईतबार भएको भारी वर्षाका कारण मानविय तथा ठूलो जनधनको क्षति ।

कखरा संवाददाता सोमबार, भदौ १३, २०७९

क्षतिग्रस्त स्थानकाे अवलाेकन गर्दै नगर प्रमुख केसी ।

रुकुम पश्चिमको आठबीसकोट नगरपालिकाका प्रमुख रवि केसी आईतबारको बाढी र पहिरोको क्षतिको अनुगमन गर्नुभएको छ । भारी वर्षासंगै वडा नम्बर १४ को पिलचौरमा झरेको पहिरोले आईतबार जाजरकोटको भेरी नगरपालिका १ मैदेका तीन आमा छोरीलाई पुर्दा दुई आमा छोरीको मृत्यु भएको थियो । यो वाहेक नगरका १३ र १४ नम्बरमा झरेको पहिरोले आधा दर्जन घरमा पूर्ण क्षति र तीन दर्जन घर जोखिममा पर्नुका साथै खेतिबालीमा क्षति पुगेको छ ।

पिपलचौरमै रहेको काष्ठ उद्योग, केही घरहरुमा क्षति भएको अनुगमनपछि नगर प्रमुख केसीले बताउनुभयो । वन उपभोक्ता समितिको भवन, मकैबारी, धानबारीमा क्षति भएको छ । त्यस्तै वडा नम्बर १३ को भल्मा र सोतामा रहेको धानबारी, मकैबारीमा ठूलो क्षति पुगेको नगर प्रमुख केसीले बताउनुभयो । उहाँका अनुसार वडा नम्बर १३ र १४ मा ७ वटा घरहरूमा पूर्ण क्षति र ३५ वटा घर उच्च जोखिममा छन् ।

क्षतिग्रस्त स्थानकाे अवलाेकन गर्दै नगर प्रमुख केसी ।

पहिरोका कारण सडक र विद्युत पुर्ण रूपमा बन्द भएको छ । क्षति भएका घर र जग्गा विवरण संकलनका लागि वडाका जनप्रतिनिधिहरु र नेपाल प्रहरी तथा नगर प्रहरी खटिएको नगर प्रमुख केसीको भनाई छ । साथै अवरुद्ध सडक खुलाउन ब्याकुलोडर र स्काभेटरले काम गरिरहेका छन । आजै साँझ वा भोली बिहानसम्म सडक खुल्ने देखिएको नगर प्रमुख केसीले बताउनुभयो ।

आज आफु यिनै क्षतिग्रस्त स्थानमा पुगेको उहाँले बताउनुभयो । अनुगमनका क्रममा अझै क्षति हुने देखिएकोले सर्तक रहन समेत सम्बन्धित ठाउँका मान्छेहरुलाई अनुरोध गरिएको उहाँले बताउनुभयो । अनुगमनका क्रममा नगर प्रमुख केसीले पीडितहरुलाई हौसला दिनुभएको थियो । क्षतिका आधारमा राहत दिने समेत प्रतिबद्धता उहाँले जनाउनुभएको थियो ।

प्रकाशित मिति: सोमबार, भदौ १३, २०७९ १६:४३