प्रिय कमरेड तेजबहादुर ओली ज्यु,
खासमा म तपाईंलाई केवल प्रतिक नामले मात्रै सम्बोधन गर्न चाहन्थें । तर आन्दोलनले जन्माएका योद्धाहरु अहिले सिर्फ नाम मात्रैका कमरेडहरु भएकाले ‘जनयुद्ध र जनआन्दोलन’बाट स्थापित नामहरुलाई यहाँ जोडिहाल्ने हिम्मत आएन । यसैले म तपाईंलाई केवल तेजबहादुर ओलीको नामले सम्बोधन गरिरहेको छु ।

खासमा म तपाइँसंग माक्र्सवादका बिषयमा गफ गर्न चाहन्थें । कम्युनिस्ट घोषणापत्रका खेस्राखेस्रा केलाउन चाहन्थें । माक्र्सवादको राजनीतिक अर्थशास्त्र, द्वन्द्वात्मक र ऐतिहासिक भौतिकवादका बिषयमा भलाकुसारी गर्न चाहन्थें ।

पुँजीवादको उच्चतम बिन्दुमा पुगेको एउटा समृद्ध देशमा श्रमको अनुभव बटुलेकाले मैले श्रम शोषण भोगेको छु । त्यसबाट मैले माक्र्सको अतिरिक्त मुल्यको सिद्धान्तसंग साक्षात्कार हुने मौका पनि पाएको छु । ती कथा, ब्यथाहरुबाट आक्रान्त परेका नौ जवान युवाहरुलाई आफ्नै मातृभूमीमा केही गर्न र उनिहरुको परिचालनबाट समाजवादी मोडलको अर्थतन्त्र कसरी निर्माण गर्न सकिन्छ भनेर कमसेकम रुकुमको बिषयमा तपाईंसंग गफ गर्न चाहन्थें । म किन तपाईंसंग त्यो आशा राखेको हो भने तपाईं मेरो पनि प्रतिनिधि हुनुहुन्छ । कमसेकम रुकुम जिल्लालाई सुन्दर र समृद्ध रुकुम बनाउने कुरामा हामी एक ठाउँमा आउनुपर्छ भन्ने मेरो मान्यता थियो तर तपाईको एकाधिकारवादी सोच र दक्षिणपन्थी ब्यबहारले त्यो मेरो आशामा तुषारापात लागेको छ ।

त्यसैले सैद्धान्तिक बिषयभन्दा पर रहेर मैले तपाईंलाई सोध्ने भनेर केही प्रश्नहरु तयार पारेको छु । विद्युतीय माध्यमबाट तपाईं समक्ष प्रस्तुत गर्न चाहन्छु ।

१.कमरेड प्रतिक तपाईं फेरि आउँदै हुनुहुन्छ भन्ने कुरा सुनेको छु । १२ बर्षमा खोला फर्किन्छ भन्छन । कमसेकम तपाईं त पाँच बर्षमा एकपटक आउनुहुन्छ । पाँच बर्ष बितेछ क्यारे, त्यसैले त तपाईं आउने हल्ला चल्दैछ । गएको चुनाव प्रचारका क्रममा अब आउदो चुनाव प्रचारमा आउँदा सरर गाडि चढेर आउछु भन्नू भएको थियो । तर सडक त बनेन नि ! के मा आउनुहुन्छ ? घोडामा कि खच्चडमा ? त्यो घम्रोको नाकै ठोक्किने उकालोमा कसरी उक्लिनु होला ? लौरो टेक्दै ?

२. तपाइँले फेरि टिकट पाउनु भएछ । क्या भाग्यमानी है ? बधाई छ । तर Once more त तब भनिन्छ जब प्रस्तुति हेर्न लायकको हुन्छ । तपाईंले के गर्नु भो र जसको लागि हामी तपाईको लागि वान्स मोर भनौं ? हामी वान्स मोर नभन्दै आफै किन आएको ? तलव भत्ता पचाउन हो कि ?

३. कहिले बुढीको पालो कहिले बुढाको पालो, कहिले प्रतिनिधि सभाको सदस्य, कहिले प्रदेश सांसद । पुरै फेरिफेरी है ? के तपाइँ बुढाबुढी बाहेक जनयुद्धमा रुकुम पूर्वमा अरु कसैको योगदान थिएन ?

४. तपाईंलाई मैले सोध्ने एउटा महत्वपूर्ण प्रश्न सदरमुकामको बिषयमा छ । सदरमुकाम गोलखाडा बनाउने तत्कालिन सरकारको निर्णयमा तपाईंको के धारणा छ ? तपाइँ हाम्रो प्रतिनिधि होइन ? अनि किन चुइक्क नबोल्नु भएको ? कतै जनमत गुम्ने त्रासले भित्रभित्रै सताएको त होइन ? सुनिन्छ, यो सबै तपाईंहरुको जालझेल भित्र जेलिएको छ । तपाईंहरुकै कारणले ढिलासुस्ती भएको छ । जिल्ला सदरमुकाम विवाद आधा दशक बितिसक्यो । फैसला सरेको सर्यैै छ । यति ढिलासुस्ती किन ? के हामीले अपेक्षा गरेको न्यायालय यही थियो ? यस्तै अवस्थाको लागि जनयुद्ध लडिएको थियो ?

५. त्यत्रो ठूलो पालिकालाई भोट बैंक मात्रै बनाउन कति सकेको ? हिजो जनयुद्धमा सवैलाइ हुकाम, मैकोट चाहिने अहिले त्यहाँका नेता कार्यकर्तालाई भोट बैंक मात्रै बनाउने ?

६. जनसमुदायले तपाईंलाई देखाएको कालो ब्यानरमा ‘घुसखोरी र कमिसनखोरी’ भनेर लेखिएको छ । के तपाईं साच्चिकै घुसखोरी वा कमिशनखोरी नै हो त ? यस बिषयमा तपाईं लाइभ डिबेट गर्नसक्नु हुन्छ ?

अन्तिममाः
पश्चिमले पूर्वलाई हेपेको इतिहास पुरानै हो । हेपेरै धुर्बबिक्रम शाहले हामीलाई भेडा बनाए । तपाईंको हेपाहा प्रवृत्ति पनि धुर्बको भन्दा कम छैन । जब भेडाहरु मान्छे भए भने तपाईको हालत पनि धुर्बबिक्रमको जस्तै हुनेछ । यो तपाईंलाई अन्तिममा मेरो सुझाब छ । किनभने हामी मान्छे हुने प्रक्रियामा छौं । हामी Yes बल मात्रै होइन, आबस्यकता परे Reject गर्नसक्ने ल्याकत पनि राख्दैछौं ।

मेरो शब्दहरु तपाईंलाई असभ्य लाग्न सक्छ । यो असभ्य मात्रै होइन, जनआक्रोश पनि हो, आक्रोश मात्रै पनि होइन, जनभावना पनि हो भनेर तपाईंले यदि बुझिदिनु भो भने भलाइ तपाइंकै हुनेछ ।

हस्त धन्यवाद ।

पृथीछक बुढा मगर
नेपाली जनप्रगतिशिल मञ्च
पश्चिम एसिया क्षेत्रीय समिती सदस्य ।